Йылытыу системаһы 100 процентҡа әҙер

29 сентябргә ҡарата республиканың 50 муниципалитетында йылы бирелә башланы. Был хаҡта Башҡортостан Башлығы Радий Хәбиров уҙғарған аҙналыҡ оператив кәңәшмәлә төбәктең торлаҡ-коммуналь хужалыҡ министры Ирина Голованова хәбәр итте. Ведомство етәксеһе билдәләүенсә, йылытыу миҙгеленә әҙерлек осоронда 15,6 мең күп фатирлы йортта йылытыу системаларын йыуыу һәм гидравлик һынауҙар үткәрелгән. 9,8 меңендә боҙолған контроль-үлсәү приборҙары һәм ҡорамалдары ремонтлана һәм алмаштырыла, 469 күп фатирлы йортта үткәргес торбалар участкаларының герметиклығы тергеҙелә, тағы 1,7 мең биналарҙың конструктив элементтары ремонтлана һәм алмаштырыла. Объекттарҙың ҡышҡа әҙерлеге 100 процент тәшкил итә. Ирина Голованова һөйләүенсә, йылытыу миҙгелендә авария хәлдәренә торлаҡ-коммуналь хужалыҡ предприятиелары 464 берәмек резерв электр тәьминәте сығанағы әҙерләгән һәм 326 авария-тергеҙеү бригадаһын ойошторған. 29 сентябргә ҡарата 50 муниципалитетта 2,1 мең социаль объектҡа һәм 6,7 мең күп фатирлы йортҡа йылы бирелгән. Ҡалған объекттарҙы тоташтырыуҙы 1 октябрҙән дә һуңға ҡалмайынса тамамлау планлаштырыла. – Йылылыҡ биреү мәсьәләләре буйынса халыҡҡа үҙҙәренең идара итеүсе компанияларына, һуңынан ҡала һәм район хакимиәттәренә мөрәжәғәт итергә кәрәк. Ҡыҙыу линия телефондарының номерҙары Башҡортостандың Торлаҡ-коммуналь хужалыҡ министрлығы һәм Дәүләт торлаҡ-төҙөлөш күҙәтеүе сайттарында урынлаштырылған, - тине Ирина Голованова. – Беҙгә мөрәжәғәттәр килә башланы ла инде. Улар өҫтөндә республика һәм муниципалитеттар менән идара итеү үҙәге менән бергә эшләйбеҙ. Башҡортостан Башлығының социаль коммуникациялар буйынса идаралығы начальнигы Дмитрий Черенков хәбәр итеүенсә, торлаҡ-коммуналь хужалыҡ өлкәһе икенсе аҙна рәттән социаль селтәрҙәрҙә мөрәжәғәттәр һаны буйынса алдынғылыҡты биләй. Уларҙың күбеһе йылытыуҙы тиҙләтеү үтенесе менән бәйле. Өфө, Белорет һәм Нефтекама халҡы араһында әүҙемлек күҙәтелгән. Башҡортостан Башлығы йылытыу миҙгеле башланыу менән бәйле хәлде ентекле күҙәтеү кәрәклеген һыҙыҡ өҫтөнә алды һәм республика Хөкүмәтенә килеп тыуған һорауҙарға тиҙ арала яуап бирергә ҡушты. – Температура режимына талаптарҙы һәм ғәмәлдәге регламенттарҙы иҫәпкә алып, һәр муниципалитет йылылыҡ биреү тураһында ҡарарҙы үҙаллы ҡабул итергә һөйләштек, – тине Радий Хәбиров. – Урындарҙағы хәлде анализлағыҙ – төндәр һалҡын булды, кешеләр өсөн нормаль шарттар булдырыу мөһим. Фото: Башҡортостан Башлығы сайты.