Белорет урындағы туристик кодты үҫтереүгә аҡса алды

“Туризм һәм ҡунаҡсыллыҡ” милли проекты (национальный проект “Туризм и гостеприимство”) сиктәрендә Белорет ҡала үҙәгенең туристик кодын төҙөкләндереүгә 30 миллион һум аласаҡ, тип хәбәр иттеләр республиканың Эшҡыуарлыҡ һәм туризм министрлығынан. Дәүләт ярҙамы “Белорет — туристик йәлеп итеү ҡалаһы” проектын тормошҡа ашырыуға йүнәлтеләсәк. – Проектты субсидиялау һөҙөмтәһендә заманса туристик инфраструктура булдырыласаҡ, ул Белоретҡа килеүселәр өсөн йәлеп итеүсәнлекте арттырырға һәм туристар ағымын арттырырға мөмкинлек бирәсәк. Ҡунаҡтарҙың һәм ҡала халҡының уңайлылығы яҡшырыуы, туризм һәм ҡунаҡсыллыҡ өлкәһендә урындағы эшҡыуарлыҡтың үҫеше көтөлә. Һөҙөмтәлә ҡала сәйәхәтселәр өсөн популяр йүнәлеш булараҡ үҙенең статусын нығыта һәм артабанғы үҫеш өсөн инвестициялар йәлеп итә аласаҡ, — тип аңлатма бирҙе Башҡортостандың эшҡыуарлыҡ һәм туризм министры Светлана Верещагина. Проектты тормошҡа ашырыуға дөйөм финанслау күләме 150,3 миллион һум тәшкил итә, шул иҫәптән милли проект буйынса федераль бюджеттан 29,4 миллион һум, республика бюджетынан 0,6 миллион һум бүленәсәк, урындағы бюджет 0,3 миллион һум бирәсәк, 120 миллион һум шәхси инвестициялар рәүешендә йәлеп ителәсәк. Белорет ҡалаһы үҙәген төҙөкләндереү буйынса саралар сиктәрендә туристик навигация, туристик-мәғлүмәт үҙәге, йәрминкә һәм ваҡиға зоналары, бәләкәй архитектура формалары, биналарҙы архитектура яҡтыртыу һәм башҡалар ҡуйыу планлаштырыла. – Проектта ҡатнашыу беҙгә ҡунаҡтар, шулай уҡ ҡала халҡы өсөн файҙалы һәм функциональ яҡтан йәмәғәт киңлектәрен тултырырға һәм биләмәне аңлайышлы һәм уңайлы навигация менән тәьмин итергә мөмкинлек бирәсәк. Территорияны төҙөкләндереү туристар өсөн ҡыҙыҡлы маршрут булдырыуға ыңғай йоғонто яһай. Ҡалала балалар һәм өлкәндәр өсөн хәүефһеҙ йәйәүлеләр зонаһы барлыҡҡа киләсәк, — тип билдәләне Белорет ҡалаһы хакимиәте башлығы Вероника Домнина. 2023-2024 йылдарҙа “Туризм һәм ҡунаҡсыллыҡ” милли проекты сиктәрендә Өфө һәм Бөрө ҡалалары үҙәктәре төҙөкләндерелә. Әлеге ваҡытта Стәрлетамаҡ ҡалаһының үҙәген төҙөкләндереү буйынса саралар алып барыла. Фото: "Башҡортостан" ДТРК-һы.