Անկախություն ձեռք բերելու գործընթացը նման է գնացքի վագոնից ավտոմեքենայով ճանապարհը շարունակելուն, հայտարարել է վարչապետ Նիկոլ Փաշինյանը։ Նա այդ մասին ասել է Արմավիր քաղաքում ՀՀ անկախության 34-րդ տարեդարձին նվիրված Ֆեստիվառին:
Փաշինյանը պետությունը համեմատել է ավտոմեքենայի հետ, որն «իր տիրոջը՝ ժողովրդին, կարող է Ա կետից Բ կետը տանել»։
«Ինչպես յուրաքանչյուր ավտոմեքենա, մենք պետք է հոգ տանենք մեր պետության վիճակի մասին: Մեր պետության փաստաթղթերը, ինչպես ավտոմեքենայի պարագայում, պետք է լինեն տեղին և կարգին: Պետք է իմանանք համաշխարհային երթևեկության կանոնները, որպեսզի ի վիճակի լինենք մեր պետության՝ մեր մեքենայի վարումով ճիշտ և շրջահայաց ձևով հասնել այն կետին, որի մասին երազում ենք, իսկ այդ կետն ազատությունն է, բարեկեցությունը, անվտանգությունը, խաղաղությունը և երջանկությունը»,- ասել է նա։
Փաշինյանը հավելել է, թե պետք է իմանանք համաշխարհային երթևեկության կանոնները, որպեսզի ի վիճակի լինենք «մեր պետության՝ մեր մեքենայի վարումով ճիշտ և շրջահայաց ձևով հասնել այն կետին, որի մասին երազում ենք»: Իսկ այդ կետը, ըստ նրա, ազատությունն է, բարեկեցությունը, անվտանգությունը, խաղաղությունն ու երջանկությունը:
«Ես ուզում եմ վստահաբար բոլորիդ հավաստիացնել, որ այսօր, այո՛, մեր երկիրը շատ վստահ է զգում իրեն այդ ճանապարհին»,- ընդգծել է վարչապետը:
Անկախության տոնը Հայաստանում նշվում է ամեն տարի սեպտեմբերի 21-ին։ 1990-ի օգոստոսի 23-ին Հայաստանի գերագույն խորհուրդն ընդունել էր Հայաստանի անկախության հռչակագիրը, որտեղ նշված էր, որ ՀԽՍՀ-ն կազմալուծվում է և ձևավորվում է նոր պետություն՝ Հայաստանի Հանրապետությունը։ 1991-ի սեպտեմբերի 21-ին հայ ժողովուրդն անկախության հանրաքվեի ժամանակ կողմ էր քվեարկել Խորհրդային Միության կազմից դուրս գալու օգտին։
Նորություններին հետևեք մեր կայքում, ինչպես նաև Telegram-ում և YouTube-ում