Күренекле яҡташыбыҙ, Башҡортостан Республикаһының атҡаҙанған фән эшмәкәре,биология фәндәре докторы Йәлил Төхвәт улы Һөйөндөков үҙенең күркәм

Күренекле яҡташыбыҙ, Башҡортостан Республикаһының атҡаҙанған фән эшмәкәре,биология фәндәре докторы Йәлил Төхвәт улы Һөйөндөков үҙенең күркәм 65 йәшлек юбилейын билдәләй.

Йәлил Һөйөндөков 1960 йылдың 20 сентябрендә Баймаҡ районы Үрге Мәмбәт ауылында тыуа. Башланғыс белемде үҙенең тыуған ауылында алғандан һуң артабан белемен Баймаҡ интернат–мәктәбендә дауам итә. 1978 йылда уны тамамлай һәм Башҡортостан ауыл хужалығы институтының агрономия факультетына уҡырға инә. Тырыш егет Максим Горький исемендәге стипендия алып уҡый. 1983 йылда уны уңышлы тамамлап, ошо институтта ассистент булып хеҙмәт юлын башлай, аспирантураға уҡырға инә. 1989 йылда Новосибирск ҡалаһында СССР Фәндәр академияһы Себер бүлексәһе Тупраҡ ғилеме һәм агрохимия институтында «Башҡортостандың дала Урал яръяғында ҡәҙимге ҡара тупраҡлы ерҙәрҙең үҙенсәлектәренә һәм һыу режимына һуғарыуҙың йоғонтоһо» тигән темаға агротупраҡ, агрофизика ғилеме специальносы буйынса кандидатлыҡ диссертацияһын яҡлай. Төрлө йылдарҙа Башҡортостан ауыл хужалығы институтының ер эшкәртеү һәм тупраҡ ғилеме кафедраһы ассистенты, Сибай филиалының тәбиғәт ғилеме кафедраһы доценты, өлкән уҡытыусыһы, Сибай институтының (филиалының) социаль-иҡтисади һәм кадрҙар эше буйынса директор урынбаҫары, 1999—2001 йылдарҙа — ошо уҡ институтта тәбиғәт фәндәре кафедраһының өлкән ғилми хеҙмәткәре, агроэкология кафедраһы доценты, 2001—2009 йылдарҙа — ситтән тороп уҡыу бүлексәһе буйынса директоры урынбаҫары, экология кафедраһы профессоры. 2004—2009 йылдарҙа — Башҡортостан Республикаһы Фәндәр академияһының Сибай филиалы директоры, бер үк ваҡытта экология һәм тәбиғәт ресурстарын һөҙөмтәле файҙаланыу лабораторияһы мөдире булып эшләй. 2001 йылда Йәлил Төхвәт улы Рәсәй Фәндәр академияһы Волга бассейны экологияһы институтында «Башҡортостан Урал аръяғының тупраҡ уңдырышлылығына экологик йүнәлешле идаралыҡ» темаһына «экология» специальносы буйынса докторлыҡ диссертацияһын яҡлай. Йәлил Һөйөндөков 15 кандидатлыҡ һәм 1 докторлыҡ диссертацияһын яҡлауға әҙерләй. Ғилми хеҙмәттәре өсөн Йәлил Төхвәт улына 2001 йылда “Башҡортостан Республикаһының атҡаҙанған фән эшмәкәре” тигән исем бирелә. Бөгөнгө көндә арҙаҡлы яҡташыбыҙ, “Халыҡтар дуҫлығы” ордены кавалеры Өфө фән һәм технологиялар университетының Сибай филиалында өлкән ғилми хеҙмәткәр булып эшләй. Йәлил Төхвәт улы Һөйөндөковҡа оло юбилейы уңайынан ныҡлы һаулыҡ, ғаилә именлеге, эшендә уңыштар теләйбеҙ!