Яһалма интеллект өлкәһендә проекттарҙы үҫтереү программаһын башлайҙар

Башҡортостанда яһалма интеллект өлкәһендә проекттарҙы үҫтереү программаһын башлайҙар. Тейешле меморандумға MOSCOW Startup Summit майҙансығында AIRI институты, Урал банкы һәм Өфөләге Вуз-ара кампустың Геном үҙәгендә урынлашҡан баш ҡаланың “21-се мәктәбе” ҡул ҡуйған. Меморандумға ярашлы, яҡтар яһалма интеллект өлкәһендә ғилми-тикшеренеү эшмәкәрлеген үҫтереү тураһында килеште. Инновацион проекттарҙы әҙерләү һәм тормошҡа ашырыуҙан тыш, берлектәге тикшеренеүҙәр үткәрергә планлаштырыла. Материалдар башҡа технологик компаниялар менән тәжрибә уртаҡлашыу өсөн нигеҙ була һәм фәнни берләшмәгә өлөш индерә ала. -Яһалма интеллект өлкәһендәге проекттарҙы үҫтереү төбәктең иҡтисади үҫешен һәм конкурентлыҡ һәләтен арттырыуҙың ҡеүәтле драйверы булып тора. ЯИ-технологиялар ярҙамында төп тармаҡтарҙы - агросәнәғәт комплексынан алып һаулыҡ һаҡлауға һәм торлаҡ-коммуналь хужалыҡҡа тиклем оптималләштерергә мөмкин. Был йәнә етештереүсәнлекте арттырыу, юғары технологиялы эш урындары һәм инвестициялар ағымы ла. Төбәктә көслө фәнни һәм етештереү базаһы, ИТ-комплекс булдырылған һәм уларҙы яһалма интеллект мөмкинлектәре менән берләштереү юғары һөҙөмтә бирәсәк, - тип аңлатма бирҙе Башҡортостан Хөкүмәте премьер-министрының беренсе урынбаҫары - иҡтисади үҫеш һәм инвестиция сәйәсәте министры Рөстәм Моратов. Белешмә Евразия Фәнни-белем биреү үҙәгенең юғары уҡыу йорттары араһындағы студенттар кампусы Рәсәй Президенты ҡушыуы буйынса һәм Рәсәй Мәғариф һәм фән министрлығының “Фән һәм университеттар” милли проектын тормошҡа ашырыу сиктәрендә төҙөлә. Өфө кампусы проекты - 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялары, эшлекле зоналары, магазиндары, уңайлы скверҙары һәм башҡа уңайлы ҡала мөхите объекттары булған студенттар өсөн урын. 2030 йылға илдә 25 кампустан торған селтәр барлыҡҡа килергә тейеш. Был йүнәлеш буйынса эште РФ Хөкүмәте һәм Рәсәй Мәғариф һәм фән министрлығы алып бара. Әлеге ваҡытта “Йәштәр һәм балалар” милли проекты ярҙамында 24 ошондай студент ҡаласығы проектлана һәм төҙөлә. 2036 йылға кампустар һаны 40-ҡа тиклем артасаҡ. Мәғлүмәт һәм фото сығанағы: https://pravitelstvorb.ru/news/27601/