"Бында эшләгән кешеләр, уларҙың эшкә мөнәсәбәте айырыуса һоҡландыра"

1 октябрҙә Өфөлә Рәсәй Президентының Волга буйы федераль округындағы тулы хоҡуҡлы вәкиле Игорь Комаров һәм Башҡортостан Башлығы Радий Хәбиров Республика кардиология үҙәгендә булды. Билдәләп үтәйек, был учреждение – республикала пациенттарға “йөрәк-ҡан тамырҙары хирургияһы” профиле буйынса махсуслаштырылған, шул иҫәптән юғары технологиялы медицина ярҙамы күрһәткән берҙән-бер учреждение. Кардиоүҙәк составында 518 койкалыҡ стационар һәм сменаһына 320 кешегә иҫәпләнгән поликлиника эшләй. 2025 йылда Республика кардиология үҙәгенең яңы хирургия корпусы төҙөлөп бөтә. Видеоконференцбәйләнеш тәртибендә уның эшенә Рәсәй Президенты Владимир Путин старт бирҙе. Яңы бина алты хирургия бүлеген, ике операция блогын һәм ике реанимация блогын үҙ эсенә ала. Уның асылыуы арҡаһында төбәктә йөрәк һәм ҡан тамырҙарына юғары технологиялы интервенцияларҙың бөтә төрҙәрен, шул иҫәптән ҡатмарлы гибрид операцияларҙы, йөрәк трансплантацияһын башҡарыу мөмкин була. 2021 йылдың ғинуарынан кардиоүҙәктә Йөрәк-ҡан тамырҙары хәүефенә идара итеү үҙәге эшләй. Игорь Комаров һәм Радий Хәбиров уның эше менән танышты. Республика кардиология үҙәгенең баш табибы Ирина Николаева һөйләүенсә, белгестәр республикала йөрәк-ҡан тамырҙары ауырыуҙары менән сирләгән кешеләрҙең хәлен дистанцион контролдә тота, ашығыс пациенттарҙың хәлен тәүлек әйләнәһенә күҙәтә, Ашығыс медицина ярҙамы бригадаларынан һәм фельдшерҙарҙан ЭКГ ҡабул итә. Ошо ҡараш арҡаһында республикала ҡан әйләнеше системаһы ауырыуҙарынан үлем осраҡтары биш йыл эсендә 24 процентҡа кәмегән. Башҡортостан бындай Үҙәк булдырылған тәүге төбәк булды. Бөгөн бындай учреждениелар Рәсәй Федерацияһының башҡа субъекттарында ла бар. Республика тәжрибәһен үҙләштереү өсөн бөтә илдән һәм яҡын сит илдәрҙән киләләр. Республика кардиология үҙәгенә барған саҡта Рәсәй Президентының Волга буйы федераль округындағы тулы хоҡуҡлы вәкиле һәм Башҡортостан Башлығы шулай уҡ операция бүлмәләренең береһен, палаталарҙы һәм музейҙы ҡараны, ул 2025 йылда медицина учреждениеһында асылды. Игорь Комаров кардиология үҙәгенең һәм, атап әйткәндә, Йөрәк-ҡан тамырҙары хәүефенә идара итеү үҙәгенең эшен юғары баһалай. – Бында төбәк етәкселегенең әүҙем ҡатнашыуы күренә. Ҡулланылған ҡорамалдар, технологиялар кимәле һәм республика халҡына медицина ярҙамы күрһәтеү системаһы һоҡландыра, – тине Рәсәй Президентының Волга буйы федераль округындағы тулы хоҡуҡлы вәкиле. – Әммә бында эшләгән кешеләр, уларҙың эшкә мөнәсәбәте айырыуса һоҡландыра. Был, моғайын, иң мөһиме. Уларға артабан да үҫеш һәм уңыштар теләйем. Фото: glavarb.ru.