Хөкүмәт йортонда яңы инспектор менән таныштырҙылар

Александр Окатьев Башҡортостан Республикаһы буйынса баш федераль инспектор итеп тәғәйенләнде. 1 октябрҙә Хөкүмәт йортонда яңы инспектор менән Рәсәй Президентының Волга буйы федераль округындағы тулы хоҡуҡлы вәкиле Игорь Комаров таныштырҙы. Сарала Башҡортостан Башлығы Радий Хәбиров, республика Хөкүмәте ағзалары, төбәк Дәүләт Йыйылышы – Ҡоролтай депутаттары, федераль башҡарма власть органдарының һәм хоҡуҡ һаҡлау органдарының территориаль бүлексәләре етәкселәре, традицион конфессияларҙың дини лидерҙары ҡатнашты. Рәсәй Президентының Волга буйы федераль округындағы тулы хоҡуҡлы вәкиле яңы федераль инспекторҙың Башҡортостан буйынса ҙур тәжрибәһен билдәләне һәм уға эшендә уңыштар теләне. – Александр Леонидович ҙур хеҙмәт юлын үтә. Үҙенең эше менән ул коллегаларының һәм етәкселектең хөрмәтен яуланы, Рәсәй Федерацияһы граждандарының мәнфәғәттәрен яҡлауҙа етди һөҙөмтәләргә өлгәште. Александр Леонидовичтың тәжрибәһе, уның хоҡуҡи һәм хоҡуҡ һаҡлау өлкәләрендәге тәрән белеме артабанғы эшендә ярҙам итер, ил етәкселеге ҡуйған бурыстарҙы һөҙөмтәле тормошҡа ашырыуға булышлыҡ итер, тип ышанам, – тине Игорь Комаров. Эштең өҫтөнлөклө йүнәлештәре хаҡында һөйләгәндә, Рәсәй Президентының Волга буйы федераль округындағы тулы хоҡуҡлы вәкиле илде үҫтереүҙең милли маҡсаттарына өлгәшеүгә, милли проекттарҙың яңы циклын тормошҡа ашырыуға, махсус хәрби операцияға ярҙам итеүгә иғтибарҙы йүнәлтте. Был йәһәттән төп федераль власть органдарына федераль башҡарма власть органдары эшмәкәрлеген координациялау, граждандарҙың хоҡуҡтарын һәм азатлыҡтарын тәьмин итеү, сәйәси партияларҙың төбәк бүлексәләре һәм граждандар йәмғиәте институттары менән үҙ-ара хеҙмәттәшлеген, власть һәм халыҡ араһында диалог төҙөү бурыстары йөкмәтелде. Республика идара итеү командаһы ҡуйылған маҡсаттарға өлгәшеүҙә Федераль үҙәк менән һөҙөмтәле эшләүен дауам итәсәк, тип белдерҙе Башҡортостан Башлығы. – Рәсәй Президентының Волга буйы федераль округындағы тулы хоҡуҡлы вәкиле аппараты һәм федераль башҡарма власть органдары етәкселәре менән тығыҙ бәйләнештә беҙ дәүләт башлығы Владимир Владимирович Путин ҡуйған бурыстарҙы уңышлы хәл итеүҙе дауам итәсәкбеҙ. Башҡортостан Республикаһы буйынса Баш федераль инспектор вазифаһында Александр Леонидович үҙенең иң яҡшы эшлекле һәм идара итеү сифаттарын тулыһынса күрһәтер, тип ышанам. Бөтә кимәлдәге власть органдары менән ведомство-ара үҙ-ара эш итеүҙе нығытыуға, милли проекттарҙы һәм дәүләт программаларын уңышлы тормошҡа ашырыуға ҙур өлөш индерер, - тине Радий Хәбиров. Александр Окатьев Рәсәй Президентының Волга буйы федераль округындағы тулы хоҡуҡлы вәкиленә күрһәткән ышанысы өсөн рәхмәт әйтте һәм Башҡортостанда һөҙөмтәле эшләүенә ышанысын белдерҙе. - Республика әүҙем үҫешә, алдында торған бурыстарҙы үтәй. Берлектәге эшебеҙ ил етәкселеге һәм халыҡ алдына ҡуйған мәсьәләләрҙе уңышлы хәл итергә мөмкинлек бирер тип иҫәпләйем, – тине Александр Окатьев. Белешмә: Окатьев Александр Леонидович 1972 йылдың 30 декабрендә Киров өлкәһе Киров ҡалаһы Ленин районы Лянгасово ҡасабаһында тыуған. Урал дәүләт юридик академияһын тамамлаған. Хеҙмәт эшмәкәрлеген 1993 йылда Киров ҡалаһының Октябрь районы прокуроры ярҙамсыһы булып башлай. 1996-1997 йылдарҙа - Киров өлкәһе прокуратураһының енәйәт эштәре буйынса суд ҡарарҙарының законлылығын күҙәтеү бүлеге прокуроры. 1997-1999 йылдарҙа - Киров өлкәһе Оричевский районы прокуроры урынбаҫары. 1999-2002 йылдарҙа - Киров өлкәһе Нолинский районы прокуроры. 2002-2004 йылдарҙа - Киров өлкәһенең Кирово-Чепецк ҡала прокуроры. 2004-2012 йылдарҙа - Киров өлкәһе прокуроры урынбаҫары. 2012-2018 йылдарҙа - Киров өлкәһе прокурорының беренсе урынбаҫары. 2018-2024 йылдарҙа - Рәсәй Федерацияһы Генераль прокуратураһының Волга буйы федераль округы буйынса идаралығы начальнигы. 2025 йылда – Татарстан Республикаһы буйынса федераль инспектор. II дәрәжә “Ватан алдындағы хеҙмәттәре өсөн” орден миҙалы менән бүләкләнгән. Фото сығанағы: glavarb.ru.