Агродиктант өсөн офлайн-майҙансыҡтар Нуриман районы Байгилде ауылындағы Р.С. Исмәғилев исмендәге лицейҙа һәм Бүздәк районы Бүздәк ауылының 1-се урта мәктәбендә ойошторола. Уларҙа 2025 йылдың 1 сентябрендә агротехнология кластары эшләй башланы. Сарала 226 уҡыусының ҡатнашыуы көтөлә. Хәтерегеҙгә төшөрәбеҙ, Башҡортостан Республикаһында ике агрокласс “Аҙыҡ-түлек хәүефһеҙлеген технологик тәьмин итеү” милли проектының “Агросәнәғәт комплексында кадрҙар” төбәк проекты сиктәрендә заманса ҡорамалдар һәм инвентарь алды. Агрокластарҙы йыһазландырыуға сығымдар 7 миллион һумдан ашыу тәшкил итә. Төбәк проектына ярашлы агрокластар төҙөүгә сығымдарҙың 90 проценты федераль һәм төбәк бюджеттарынан ҡапланасаҡ. – Был сараға республиканың агросәнәғәт комплексы, төбәк Ауыл хужалығы министрлығы вәкилдәре генә түгел, ауыл хужалығы өлкәһенә ҡыҙыҡһыныу күрһәткән һәр кем, шул иҫәптән мәктәп, урта махсус һәм юғары уҡыу йорттары уҡыусылары ла ҙур ҡыҙыҡһыныу күрһәтер, тип ышанам. Сөнки "Агродиктант" – аграр мәсьәләләрҙә үҙ компетентлығын арттырырға һәм сифатлы белем алырға теләүселәр өсөн уникаль мөмкинлек, – тип билдәләне Башҡортостан Республикаһы Хөкүмәте Премьер- министры урынбаҫары – ауыл хужалығы министры Илшат Фәзрахманов. Беренсе Бөтә Рәсәй агродиктант 8 - 12 октябрҙә үтә. Ул Ауыл хужалығы һәм эшкәртеү сәнәғәте хеҙмәткәрҙәре көнөнә арнала. Сараның маҡсаты – ауыл хужалығы тармағын, аграр һөнәрҙәрҙе һәм ауылда йәшәү рәүешен популярлаштырыу, Рәсәйҙең агросәнәғәт комплексы тураһында белемде арттырыу. Ҡатнашыусыларға тупраҡ ғилеме, үҫемлекселек, малсылыҡ, балыҡсылыҡ, ауыл инфраструктураһы, аҙыҡ-түлек сәнәғәте, экспорт, һанлаштырыу, ауыл хужалығы техникаһы һәм агротуризмды үҙ эсенә алған 30 һорауға яуап бирергә тура киләсәк. Тест эшләүгә 45 минут ваҡыт бирелә. Башҡортостандың муниципалитеттарында 200-ҙән ашыу майҙансыҡ ойоштороласаҡ. Ҡатнашыу йомғаҡтары буйынса, теркәлгән һәр кем электрон сертификат аласаҡ, ә еңеүселәр – дипломдар. Тулыраҡ мәғлүмәт проект сайтында. Бынан тыш, 2 октябрҙә 15.30 сәғәттә ТАСС-та (Мәскәү) агродиктантҡа арналған матбуғат конференцияһы үтәсәк. Спикерҙар – “Берҙәм Рәсәй” партияһының “Рәсәй ауылы” федераль партия проекты координаторы, Федерация Советының Аграр аҙыҡ-түлек сәйәсәте һәм тәбиғәттән файҙаланыу буйынса комитеты рәйесе Александр Двойных һәм Россельхозбанк идараһы рәйесе урынбаҫары Денис Константинов. Трансляция ТАСС сайтында, шулай уҡ “Бәйләнештә”ге ТАСС Матбуғат үҙәге төркөмөндә күрһәтеләсәк. Фото сығанағы: pravitelstvorb.ru.