“Беҙ Еңеү менән ҡайтырбыҙ!”

42 йәшлек ханым 2024 йылдың 15 майынан Рәсәй Федерацияһының Оборона министрлығы менән килешеү төҙөп, МХО биләмеһенә юлланған. Тәүҙә ул Пилотһыҙ осоу аппараттары часында блиндаждарҙа, һуңынан Донецк һәм Луганск госпиталдәрендә яралыларҙы дауалай. Ошо осорҙа фиҙакәрлеге өсөн дәүләт наградаларына лайыҡ була: «Хәрби хеҙмәттәре өсөн», «МХО-ла ҡатнашҡан өсөн», «Һәләкәткә осрағандарҙы ҡотҡарған өсөн» миҙалдары уның күкрәген биҙәй. Айгөл Фәрид ҡыҙы - МХО-ла аяҡ һәм ҡул яраларынан һуңғы нейропатиялар менән шөғөлләнгән берҙән-бер табип. “Донецк Халыҡ Республикаһында еңелсә яраланғандар өсөн дауаханала үҙемдең экспресс-реабилитация бүлмәһен ойошторҙом, унда, реабилитация табибы булараҡ, һалдаттарҙы экспандерҙар һәм аппликаторҙар ярҙамында аяҡ-ҡулдар йөрөшөн яҡшыртырға өйрәтәм. 2022 йылдан Башҡортостандан МХО биләмәһенә гуманитар кәрәк-яраҡтар килтереү менән әүҙем шөғөлләнәм. Бындағы хәлдәр, башымдан кискәндәр хаҡында "Үҙ күҙҙәрем менән" тигән китап яҙам. Тыуған яҡтарыма ҡайтҡас, реабилитация һәм тергеҙеү медицинаһы буйынса халыҡ-ара үҙәк асырмын тип хыялланам” – ти Айгөл. Еңел яралылар өсөн госпиталдәрҙә эшләгән осорҙа ул ҡул-аяҡ йәрәхәттәрен реабилитациялау буйынса үҙ программаһын төҙөй, госпиталдәргә ирекмәндәр менән берлектә 400-гә яҡын экспандер һәм 200-гә яҡын Кузнецов аппликаторы тапшыра. Уның ярҙамында 300-гә яҡын һалдат һауығыуға һәм ауыр эҙемтәләрҙән ҡотолоуға өлгәшкән. Башҡорт дәүләт медицина университетының медицина реабилитацияһы, физиотерапия һәм спорт медицинаһы кафедраһы мөдире, медицина фәндәре докторы, профессор Лира Тәлғәт ҡыҙы Ғилметдинова менән берлектә яраланған яугирҙәргә тиҙерәк һауығыу буйынса тәҡдимдәр яҙа. Айгөл Фәрид ҡыҙы ике бала әсәһе: Леонард-Әмиргә –12, Юлианаға 11 йәш. “Отпуск ваҡытында, үҙебеҙҙең ғаилә йолаһын үтәп, Өфө хосписын яҡлап, 11-се Өфө халыҡ-ара марафонында хәйриә йүгереүсеһе булараҡ ҡатнашырға өлгөрҙөм. Республика Хөкүмәте менән осрашып, МХО яугирҙәрен реабилитациялау буйынса көнүҙәк мәсьәләләр хаҡында һөйләштек. Оҙаҡламай эфирға сығасаҡ заманыбыҙ ҡаһармандары хаҡында ике тапшырыуға яҙылырға өлгөрҙөм. “Беренсе тирмә” ирекмәндәр төркөмө менән дә осраштым. Улар менән дә МХО-лағыларға ярҙам хаҡында кәңәшләштек. Ялымда шулай уҡ яҡындарым – әсәйем, ағайым, балаларым һәм туғандарым менән аралашыу менән дә бәхетле булдым”, – ти Айгөл. Дүртенсе тапҡыр яу яланына юлланғанында ул тәүәккәл һәм ышаныслы итеп әйтә: “Мин бында кәрәгерәк!” Фотоларҙа: Айгөл Заһиҙуллина портреты; Айгөл балалары менән марафонда; “Беренсе тирмә” ирекмәндәр төркөмө менән; Айгөл эш ваҡытында; Дүртенсе тапҡыр МХО биләмәһенә, юлға!