Дружина научников од Ціурихскаго высшего училища, жидовскаго высшего училища в Іеросолиму и Масачусетскаго технологичнаго изучилища представише първи выданіа инноваторскаго експеримента QROCODILE, ктор имаше цѣлі наидти ліегко тіемно твориво. Изъискатели имаху успѣх поставити нови, точнѣіши ограниченіа іествованіа хипотетичных чѧстиц тіемнаго творива с масоіѫ до 30 кеВ, что іе важным прорывом в сіеі области физикы. Выданіа сѫ онародовани в часопису Physical Review Letters.
Експеримент QROCODILE (Квантва Криогенна Обсерватория за Исканіе Тіемнаго Творива с Низкоіѫ Енергіеі, има другы подход до исканіа. Замѣсто традициіных вѣскых детекторов из тѣкѫчего ксенона или хрусталов германіа, он корыста надпроводни нанодрутни іеднофотонови детекторы (SNSPDs). Ови квантови сенсоры, кторы од почѧтку сѫ створени за пречутливо личаніе фотонов, нынѣ сѧ корыстѫт и како цѣлі, и како детектор тіемнаго творива.
Кліучева изгода іе в рекордно низкому енергетичному прагу чутливости (0,11 еВ). То уможнуіе записывати ничтожни енергетични избухы, кторы биху могли изкидати ліегкы чѧстицы тіемнаго творива при контакту с обыкновенным творивом, что не іе достѫпным дліа вечинства детекторов днесі. През първи опыт детекор, же быше охладен до 100 миликелвин, працоваше вече неж 415 часов и записаше 15 слабых непознаных знаков. Научницы подчъркаіѫт, же сіи знацы не іе можным приіѧти както доказ іествованіа тіемнаго творива, бо то може быти фонови прешкоды, але факт такоі чутливости одкрыва нови можности исканіа.
Важливості експеримента QROCODILE іе в можности іедноставно глѧдати взаіемну дѣіності ліегкаго тіемнаго творива и с електронами, и с нуклонами (протон, неутрон), что іе необычаіным. Далѣі научницы плануіѫт поширити состав, творѧчи цѣпі из десѧти мегапикселов подобных детекторов, что хте кратно превыси чутливості устроіа и може быти позволи не само изкліучати теоретични моделы, но и вѣрогодно разпознавати знак тіемнаго творива на позадіи шума.
Ово сбытіе значи важны стратегичны сдвиг в исканіи тіемнаго творива, кторы вече иде до предных квантовых технологиі шукаіѫчи вѫтрѣ ранѣі недостѫпных обсѧгов мас и енергиі.