Радий Хәбиров Ленин исемендәге паркты реконструкциялау барышы менән танышты

Хәтерегеҙгә төшөрәбеҙ, эштәр 2025 йылдың яҙында башланды һәм ике йыл дауам итәсәк. Парк төбәк әһәмиәтендәге мәҙәни мираҫ объекты булғанлыҡтан, уның бөтә төп элементтары һәм объекттары һаҡланасаҡ. Реконструкция барышын йәмәғәт контроль эшсе төркөмө күҙәтә. Подряд ойошмаһы вәкилдәре хәбәр итеүенсә, паркта гранит баҫҡыстар яңыртылған, ағастарҙы формалаштырыу үткәрелгән, тренажерҙар урынлашасаҡ спорт майҙансыҡтары өсөн нигеҙҙәр ҡуйылған, шулай уҡ яҡтыртыу таяуҙары һәм ҡаты таштарҙан булған брусчатка һүтелгән. Хәҙер эшселәр балалар майҙансығы, йүгереү юлы һәм йәйәүлеләр зонаһы өсөн нигеҙ әҙерләй, шул иҫәптән үҫемлектәрҙе автоһуғарыу системаһын урынлаштырыу өсөн инженер селтәрҙәрен монтажлай. Бынан тыш, Граждандар һуғышы геройҙарына һәйкәл һәм БАССР наградалары менән стела реставрацияланасаҡ. Объекттың төҙөлөш әҙерлеге 40 процент тәшкил итә. Башҡортостан Башлығы төҙөлөш-монтаж эштәре графигын теүәл үтәү кәрәклеген һыҙыҡ өҫтөнә алды. - Проект федераль сығымдарҙы файҙаланыуҙы күҙ уңында тота, уларһыҙ паркты тәртипкә килтереүе ҡыйын булыр ине. Шуға күрә «Уңайлы ҡала мөхитен булдырыу» кеүек программаларҙа халыҡ менән бергә әүҙем ҡатнашырға кәрәк, – тип билдәләне Радий Хәбиров. - Өфөлә иғтибарыбыҙҙы талап иткән биләмәләр етерлек әле. Беҙҙең үҙәк урамдарҙы яңыртыу буйынса үҙ программабыҙ бар. Йыл һайын уларҙы сиратлап ремонтлаясаҡбыҙ. Өфө менән бергә республиканың башҡа ҡалалары һәм райондары ла үҙгәрә. Быйыл биш муниципалитет Бөтә Рәсәй уңайлы ҡала мөхите булдырыуҙың иң яҡшы проекттары конкурсында еңеү яуланы. Артабан да ошо йүнәлештә эшләйәсәкбеҙ. Төбәк етәксеһе Миҙхәт Шакиров исемендәге скверҙа ла булды, унда Башҡортостандың күренекле дәүләт эшмәкәренә һәйкәл ҡуйырға ниәтләйҙәр. Хәтерегеҙгә төшөрәбеҙ, 2020 йылда скверҙа Дорофеев һәм Коммунистик урамдары яғынан тротуарға асфальт түшәлгән, брусчаткалар һалынған, йәшелләндерелгән һәм урам яҡтыртылған. Ә 2024 йылда Радий Хәбиров инициативаһы буйынса бында, Коммунистик урамындағы 75-се йорт эргәһендә, Миҙхәт Шакировҡа һәйкәл ҡуйырға ҡарар итәләр. 2025 йылдың йәйендә подряд ойошмаһы постамент урынлаштырыу өсөн биләмәне төҙөкләндереүгә тотонған. Һәйкәл ҡуйыу өсөн скверҙы төҙөкләндереүҙе 2025 йылдың ноябренә тиклем тамамларға кәрәк, тип билдәләне Башҡортостан Башлығы.