Һәр төбәккә хас булған биҙәктәр менән матурланған, күҙҙең яуын алырлыҡ әйберҙәр күргәҙмәһе күптән түгел Баймаҡ районында матур традицияға әйләнгән “Башҡорт аты” халыҡ-ара фестивалендә ҡатнашыусылар өсөн сағыу бер тамашаға әйләнде. Ябай кеше ҡулы менән тыуҙырылған мөғжизәләргә һәр кем һоҡланмайынса, уларҙы ҡулына алып ҡарамайынса, бер кем дә улар янынан тыныс уҙа алманы. Учалы районының Өргөн ауылынан килгән Айвар Сафиндың ағастан эшләнгән әйберҙәре шунда уҡ күҙгә ташланды. Нисектер үҙенә күрә ятыраҡ та, матурыраҡ та, шул уҡ ваҡытта замансараҡ та күренде оҫтаның эштәре. Атаһының юлын дауам итеп, Айвар Тәлғәт улы урмансылыҡ һөнәрен үҙ итә. Урмансылар династияһын лайыҡлы дауам иткән геройым бала саҡтан атаһына эйәреп урман гиҙә, төрлө ағас ботаҡтарын, тамырҙарын төрлө һындарға оҡшатып, уларҙы алып ҡайта, уйната. Аҡрынлап үҙе лә урманға ғашиҡ булып үҫкән егет мәктәпте тамамлағас, документтарын Өфө урмансылыҡ техникумына тапшыра. Артабан ситтән тороп Башҡорт дәүләт аграр университетының урм