Башҡортостан журналистары ҙур еңеүҙәр яулап ҡайтты!

Сочиҙа йыл да уҙғарылған сара – “Бөтә Рәсәй-2025” медиафорумы тамамланды. Илебеҙҙең барлыҡ төбәктәренән тиерлек йыйылған журналистар биш көн дауамында пленар ултырыштарҙа, “түңәрәк өҫтәл”дәрҙә, фекер алышыуҙарҙа, оҫталыҡ дәрестәрендә, ижади осрашыуҙарҙа һәм башҡа сараларҙа ҡатнашты. Фестиваль программаһы ифрат бай йөкмәткеле булды. Ойоштороусылар тармаҡтың бөгөнгө хәленә бәйле барлыҡ мәсьәләләргә иғтибар итергә тырышты, әлеге проблемалар, заман саҡырыуҙары, тенденциялар, үҫеш мөмкинлектәре – барыһына ла сарала киң байҡау яһалды. Йолаға ярашлы, хеҙмәттәштәрҙең иң яҡшы тәжрибә өлгөләре – редакция проекттары, йәмәғәт акциялары һәм башҡа ҡыҙыҡлы башланғыстар күрһәтелде. Башҡортостан журналистарының да күрһәтерлек, һөйләрлек эштәре күп булды. Ә һөнәри, ижади конкурстарҙа еңеүселәрҙе бүләкләү мәле беҙҙең өсөн ысын байрамға әйләнде. Мәҫәлән, “Киң мәғлүмәт сараларының социаль селтәрҙә, мессенджерҙарҙа иң яҡшы төркөмө (аккаунты)” номинацияһында “Башҡортостан”, “Йәшлек” һәм “Зианчуринские зори” гәзиттәре еңеү яуланы. “Иң яҡшы автор яҙмаһы (тапшырыуы)” номинацияһында “Республика Башкортостан” гәзите хәбәрсеһе Ринат Фәйзрахмановтың авторлыҡ проекты еңеүсе тип баһаланды. “Туймазинский вестник”, “Панорама”, “Абзелил” гәзиттәре “Киң мәғлүмәт сараларының социаль селтәрҙә, мессенджерҙарҙа иң яҡшы төркөмө (аккаунты)” номинацияһында икенсе урынды яуланы. “Йылдың махсус проекты (акцияһы)” номинацияһында “Ватандаш” журналы дипломант булды. Бынан тыш, 2025 йылдағы иң яҡшы журналист әҫәрҙәренә ижади конкурста “Ватандаш” журналы һәм “Зианчуринские зори” гәзите дипломант тип танылды. Наградаларҙы Рәсәй Журналистар союзы рәйесе Владимир Соловьев һәм ойошма секретары Владимир Касютин тапшырҙы. Башҡорт журналистикаһының форумда йылдан-йыл күберәк наградаға өлгәшеүе, үҫеше үтә ҡыуаныслы. Бүләкләнеүселәрҙең барыһын да ҡотлайбыҙ, артабан да уңыштар, һөҙөмтәле проекттар, сағыу еңеүҙәр теләйбеҙ! Автор - Татьяна Пискун.