Сибай ҡалаһының юбилейы – бөтә республиканың байрамы ул

Бөтә Рәсәй “Урал аръяғы-2025” инвестиция һабантуйының икенсе көнөндә Сибай ҡалаһында Башҡортостан Хөкүмәте ағзалары ҡатнашлығында “Таусылар батырлығы” һәйкәленә сәскә һалыу тантанаһы үтте. Хөкүмәт Премьер-министры Андрей Назаров Сибай ҡалаһы барлыҡҡа килеүендә һәм үҫешендә хеҙмәтсәндәрҙең ҙур өлөшөн билдәләне. 2020 йылда асылған һәйкәл ҡалаға нигеҙ һалыусыларға – таусыларға һәм уларҙың көндәлек фиҙакәр хеҙмәтенә бағышланған. Аҙаҡ ҡаланың үҙәк майҙанында Бөтә Рәсәй “Урал аръяғы-2025” инвестиция һабантуйына арналған иҫтәлекле плитаны һалыу тантанаһы үтте. – Был таш республикала яңы проекттарҙы тормошҡа ашырыу һәм булғандарын үҫтереү башланғысын кәүҙәләндерә һәм Сибай ҡалаһы үҫешен һәм төҙөлөшөн дауам итеү өсөн генә түгел, бөтә Башҡортостан өсөн дә мөһим әһәмиәткә эйә, – тине Андрей Назаров иҫтәлекле плитаны һалғанда. Форумдың икенсе көнөндәге эшлекле программа Сибай ҡалаһына нигеҙ һалыныуға 70 йыл тулыуға арналған тантаналы концерт менән тамамланды. Концерт алдынан төп майҙанда ауырлығы 980 килограмм тәшкил иткән һәм оҙонлоғо алты метрҙан ашыу булған ҙур сәк-сәкте презентациялау үткәрелде. Һыйҙы 22 аш-һыу оҫтаһы яратҡан ҡалаларының юбилейы хөрмәтенә 15 көн дауамында әҙерләгән. Андрей Назаров яҡташтарын, Сибай халҡын ҡала юбилейы менән ҡотланы. – Был юбилей Урал аръяғы тарихында ғына түгел, бөтә Башҡортостан өсөн дә ҙур ваҡиға. Күп эш беҙҙән алда хеҙмәт иткәндәр, олатайҙар, ата-бабалар тарафынан башҡарылған, беҙ ҡаланың һәр хеҙмәткәренә рәхмәтлебеҙ. Байрамдың федераль власть органдары, Рәсәй һәм халыҡ-ара компаниялар, инвестиция фондтары вәкилдәрен, Рәсәйҙең 30 төбәгенән һәм донъяның ун иленән килгән эксперттарҙы йыйған эре эшлекле форум көндәрендә барыуы айырыуса иҫтәлекле. Был Сибайҙың сәнәғәт, мәҙәниәт һәм халыҡ-ара хеҙмәттәшлек үҙәге булараҡ стратегик әһәмиәте тураһында һөйләй, – тип билдәләне етәксе ҡотлауында. – Сибай ҡалаһына артабан етеҙ үҫешеүен, билдәләнгән бөтә план һәм проекттарҙың тормошҡа ашырылыуын теләйем. Яратҡан ҡалабыҙ үҫеүен дауам итһен һәм Урал аръяғының мөһим сәнәғәт, мәҙәниәт һәм фән үҙәге булараҡ яҡшырһын, – тип Андрей Назаров яҡташтарына теләктәрен еткерҙе. Утыҙҙан ашыу ҡала хеҙмәткәренә республиканың юғары наградалары тапшырылды. Сибай ҡала хакимиәте башлығы Сергей Озерцов Сибай ҡалаһына 70 йыл тулыу уңайы менән ете яҡташына “Сибай ҡалаһының почетлы гражданы” тигән исем бирелеүен иғлан итте. Фото: Башҡортостан Хөкүмәте сайты.