Өфө аръяғын төҙөүгә - өҫтәмә федераль ярҙам

4 сентябрҙә Башҡортостан Башлығы Радий Хәбиров видеобәйләнеш тәртибендә төбәкте үҫтереү буйынса Хөкүмәт комиссияһы президиумы эшендә ҡатнашты. Уны Рәсәй Хөкүмәте Рәйесе урынбаҫары Марат Хөснуллин үткәрҙе. Көн тәртибендә - коммуналь инфраструктура объекттарын төҙөүгә ҡаҙна кредиттарын алыуға төбәктәрҙең ғаризаларын ҡарау. Улар иҫәбендә -Башҡортостандың баш ҡалаһында Өфө аръяғы биләмәһен һыу үткәреү һәм уны ағыҙыу селтәрҙәре менән тәьмин итеү. Хәтерегеҙгә төшөрәбеҙ, 2025 йылдың авгусында Хөкүмәт комиссияһы президиумы проекттың беренсе сиратын тормошҡа ашырыуға 8,5 миллиард һумлыҡ ғаризаны хупланы. Радий Хәбиров вице-премьерға республика башланғыстарына ярҙам өсөн рәхмәт әйтте һәм Башҡортостандың Өфө аръяғында 5 миллиард һумға торошло коммуналь инфраструктураның икенсе сиратын төҙөүгә заявка әҙерләүен һыҙыҡ өҫтөнә алды. - 2025 - 2027 йылдарҙа был биләмәлә ҙур эш күләме башҡарыу көтөлә. Проект бер миллион кешене һыу менән тәьмин итеү һәм һыуҙы ағыҙыу сифатын арттырырға мөмкинлек бирәсәк, – тине Башҡортостан Башлығы. - Социаль-иҡтисади һөҙөмтәләр иҫәбендә - 2040 йылға бюджеттан тыш сығанаҡтарҙан 20 миллиард һумдан ашыу аҡса йәлеп итеү. Хаҡы 14 миллиард һумлыҡ бер ҙур объект раҫланған да инде, уның буйынса сентябрҙә ер эштәре башлана. Шулай уҡ 3,5 меңдән ашыу яңы эш урыны булдырырға һәм бюджетҡа 9 миллиард һумдан ашыу өҫтәмә һалым керемдәре күләмен тәьмин итергә планлаштырабыҙ. Меморандумға ҡул ҡуйылған, заявка бирелгән объекттар коммуналь инфраструктураны модернизациялауҙың төбәк комплекслы планына индерелгән. Ғариза бөтә федераль башҡарма власть органдары һәм ойошмаларының ыңғай һығымтаһын алған. Марат Хөснуллин федераль саралар ярҙамында төҙөлгән инфраструктура объекттарының юғары социаль әһәмиәтен билдәләне. - Уларҙың барыһы ла граждандарыбыҙҙың йәшәү сифатын яҡшыртыу өсөн башҡарыла. Хупланған башланғыстарҙы тормошҡа ашырыу заманса һәм уңайлы мөхит булдырырға, транспорт һәм коммуналь инфраструктураны яҡшыртырға мөмкинлек бирәсәк, был, ахыр сиктә, төбәктәрҙә кешеләрҙең уңайлы йәшәүенә йоғонто яһаясаҡ, – тине вице-премьер. - Ҡаҙна инфраструктура кредиттары программаһын тормошҡа ашырыуҙың маҡсатлы күрһәткестәренә өлгәшеү ҡәтғи контролдә тотола, сөнки һүҙ средстволарҙы һөҙөмтәле үҙләштереү һәм граждандар алдындағы социаль йөкләмәләрҙе үтәү тураһында бара. Ил Хөкүмәте Рәйесе урынбаҫары шулай уҡ Башҡортостандың Өфө аръяғы биләмәһен үҫтереү буйынса комплекслы алымды тәьмин итеүҙәге тәжрибәһен ыңғай баһаланы. - Республиканың был мәсьәлә менән системалы шөғөлләнеүен күрәм. Юлдар ҙа, селтәрҙәр ҙә – барыһы ла комплекслы. Бындай эш өсөн рәхмәт, Радий Фәрит улы, – тип билдәләне Марат Хөснуллин. - Икенсе сиратҡа ғариза хупланды. Иң мөһиме - үҙләштереү ваҡытын оҙаҡҡа һуҙмау. Билдәләп үтәйек, проект сиктәрендә 2025-2026 йылдарҙа эштәр башланғандан алып һәм 2026 һәм 2027 йылдарҙа файҙаланыуға тапшырылғанға тиклем Өфө һәм Өфө районы биләмәһендә ете коммуналь инфраструктура объектын төҙөү ҡаралған. 2030 йылға Өфө агломерацияһының һәр тораҡ пунктын һыу менән тәьмин итеү һәм һыуҙы ағыҙыу системаһын үткәреү планлаштырыла. Шулай уҡ потенциаль төҙөлөш майҙансыҡтарын – яңы торлаҡ комплекстарын, рекреацион-туристик объекттарҙы, мәғариф учреждениеларын, сәнәғәт предприятиеларын, логистик комплекстарҙы инженер селтәрҙәре менән тәьмин итеү мөмкинлеге барлыҡҡа киләсәк. Фото һәм мәғлүмәт: https://glavarb.ru/ru/news/event/bashkortostan-poluchit-dopolnitelnuyu-federalnuyu-podderzhku-dlya-stroitelstva-kommunalnoy-infrastruktury-v-zaufime-81582/