"Башҡорт аты” фестивалендә продуктив йылҡысылыҡты үҫтереү мәсьәләһе тикшереләсәк

6 сентябрҙә Баймаҡ районының Граф күле буйында үтәсәк "Башҡорт аты" халыҡ-ара фестивалендә продуктив йылҡысылыҡты үҫтереүҙең заманса йүнәлештәре тикшереләсәк. Түңәрәк өҫтәлдә республиканың Ауыл хужалығы министрлығы, Башҡорт аграр университеты, «Башкорт аты» АНО ғилми-тикшеренеү институты, Башҡортостан Республикаһының йылҡысылыҡты үҫтереү ассоциацияһы вәкилдәре, ҡымыҙ етештереү һәм йылҡы ите продукцияһын эшкәртеүсе хужалыҡтар вәкилдәре, йылҡы тотоу өсөн төрлө ҡорамалдар етештереүселәр ҡатнашасаҡ. Сарала йылҡысылыҡ тармағына дәүләт ярҙамы күрһәтеү, йылҡысылыҡты үҫтереү мәсьәләләрен өйрәнеү, аҙыҡ һатып алыу һәм һаҡлау буйынса заманса технологиялар буйынса фекер алышыуҙар планлаштырыла. Бынан тыш, бизнес-программала йылҡысылыҡ тармағы өсөн кадрҙар әҙерләү, шулай уҡ тармаҡ продукцияһын эшкәртеү һәм һатыу темаһы буйынса фекер алышыу ҡаралған. Сара йылҡы малы һәм йылҡысылыҡ продукцияһын экспортлау йүнәлешенә ҡағыласаҡ, йылҡысылыҡ фермаларын үҫтереү буйынса уңышлы тәжрибә ҡараласаҡ. Бынан тыш, фестивалдең эшлекле өлөшө сиктәрендә түңәрәк өҫтәлдәр ойоштороласаҡ, унда милли ат спорты һәм ат туризмын үҫтереү мәсьәләләре айырым ҡараласаҡ. Иҫегеҙгә төшөрәбеҙ, быйыл “Башҡорт аты” халыҡ-ара фестивалендә 17 ил вәкилдәре, шулай уҡ Рәсәйҙең 12 төбәгенән делегациялар ҡатнаша. Тәүге тапҡыр “Башҡорт аты” фестивале “Урал аръяғы-2025” Бөтә Рәсәй инвестиция һабантуйының һәм Баймаҡ районының 95 йыллыҡ юбилейының логик дауамы буласаҡ. Фестиваль бай мәҙәни, спорт, ат спорты, эшлекле һәм күргәҙмә программаһын үҙ эсенә ала. Йола буйынса 430 аттан торған парад һәм тамашалы трюк һыбай йөрөү (джигитовка) ойошторола. Автор фотоһы