"Һеҙ ғорурлыҡ уятаһығыҙ!"

"Башинформ" мәғлүмәт агентлығында Башҡортостан йыйылма командаһы составына ингән махсус хәрби операция ветерандарын тантаналы шарттарҙа бүләкләү ойошторолдо. Түбәнге Новгород өлкәһенең Дзержинск ҡалаһында үткәрелгән Ватан һаҡсылары кубогына ярышта яҡташтарыбыҙ өс алтын һәм бер көмөш миҙал яулаған. Башҡортостан Хөкүмәте Премьер-министры урынбаҫары - республикабыҙҙың спорт министры Руслан Хәбибов бүләкләнеүселәрҙе Башҡортостан Башлығы Радий Хәбиров исеменән ҡотланы һәм былай тине: – Һеҙ бөгөн дә алғы һыҙыҡта булыуығыҙҙы дауам итәһегеҙ, һеҙгә ҡарап һоҡланабыҙ. Барыбыҙға ла бик ҙур бурыстар йөкмәтелгән, шуларҙың береһе – үҫеп килеүсе йәш быуынды һәр яҡлап та тәрбиәләү. Ысынында, йәштәр менән көслөбөҙ. Был тәңгәлдә белем усаҡтарында иҫ киткес файҙалы эштәр алып барыла. Ошо көндәрҙә уларҙың бөтәһендә лә Белем көнө байрамдары үтте. Шәхсән миңә 161-се лицейҙа ҡатнашыу бәхете тәтене. Махсус хәрби операцияла илебеҙҙең тыныслығы өсөн ғүмерҙәре өҙөлгән батырҙарҙың балаларын тәүге тапҡыр мәктәптә алып индек. Улай ғына ла түгел, беҙ ғүмер буйы уларҙы ҡурсаларға тейеш. Беҙҙең йыйылма спорт командаһына ингән махсус хәрби операция ветерандарына һәм унда ҡатнашыусыларға ҙур хөрмәт менән ҡарайбыҙ. Президент Владимир Путин уларҙың һәр береһе менән ғорурлана, ярҙамынан өҙмәй. Ветерандар араһында спорттың йылдам үҫешеүен беләбеҙ, уның киләсәктә лә шулай дауам итәсәгенә тамсы ла шик юҡ. Башҡортостан Башлығы Радий Хәбиров алдыбыҙға етди бурыстар ҡуйҙы. Үҙ сиратында, һеҙҙең тарафтан да ярҙам, һәр йәһәттән дә булышлыҡ итеү кәрәк буласаҡ. Ысынлап та, ошоларҙың барыһының да башында Башҡортостан тора, бынан бер нисә йыл элек Өфөлә Ватанды һаҡлаусылар кубогына ярыштар уҙғарылды. Ул ваҡытта сараның юғары кимәлдә ойошторолоуын әле һаман бөтәһе лә матур итеп иҫләй, маҡтап телгә ала. Әле бәйге ситтә уҙғарылған, ә башҡортостандар оло еңеүҙәргә өлгәшкән. Алтын миҙал алыусыларға дан! Яҡташтарыбыҙ береһендә, Удмурт Республикаһынан ҡала, көмөш миҙал яулаған. Шулай булыуға ҡарамаҫтан, Бөтә Рәсәй бәйгеһендә удмурттар менән бергә беҙҙекеләр ҙә ҡатнашасаҡ. Руслан Таһир улы ошолар хаҡында ла тәфсирләп һөйләне. Башҡортостан буйынса "Ватанды һаҡлаусылар" махсус хәрби операцияла ҡатнашыусыларға ярҙам дәүләт фонды филиалы етәксеһе Гөлнур Ҡолһарина билдәләүенсә, бында ултырыусыларҙың һәр береһенең яҙмышы үҙенсә, хатта ҡатмарлы. Бөтәһенә лә бөтә яҡлап иғтибар ҙур, бигерәк тә яуҙан ҡаты йәрәхәтләнеп ҡайтҡандар ярҙамға мохтаж. Техник реабилитация саралары, ҡулайлаштырылған кейемдәр, спорт ҡорамалдары, ҡул менән идара итә торған автомобилдәр алып биреү – шуға асыҡ миҫал. Республикабыҙҙың йыйылма спорт командаһы илебеҙҙә алдынғы, спортсыларҙың миҙалдары шуға дәлил. Махсус хәрби операция биләмәһендә ҡатнашыусылар фондтағы ғаиләнең бер өлөшө кеүек. Барыбыҙҙан да берҙәмлек талап ителә, илебеҙ Президентына, республикабыҙ Башлығына теләктәш булыу кәрәк. – Уларҙы спортҡа әйҙәү, һәр яҡлап та кәрәк-яраҡ менән тәьмин итеү, ярҙамдан айырмау, социалләштереү - фонд етәкселегенең иң өҫтөнлөклө проекттарының береһе, – тип өҫтәне дәүләт фонды етәксеһе һәм ауыр яҙмышҡа дусар булһа ла, һынмағаны өсөн, Рәсәйҙең атҡаҙанған спорт мастеры, күп тапҡырҙар Ҡышҡы паралимпия уйындары чемпионы Ирек Зариповты һәммәһенә лә өлгө итеп күрһәтте. Шулай уҡ махсус хәрби операция биләмәһендә ҡатнашыусылар – майор Заһир Вәлиев, республикабыҙҙың йыйылма спорт командаһы ағзаһы Рубен Хәсәнов һәм башҡалар ярҙамдан өҙмәгәне өсөн илебеҙ һәм республикабыҙ етәкселегенә сикһеҙ рәхмәтен еткерҙе. Артабан Башҡортостан данын яҡлаусыларға дәүләт наградалары тапшырылды. Улар араһында Марк Байғазов, Лев Зәйнетдинов, Радик Ильясов, Владимир Егоров, Рәмил Сәлихов, Артем Мөхәррәмов һәм башҡа батырҙарҙы күреү ҡыуаныслы ине. Фото: Илдар Аҡъюлов.