"Башҡорт аты - Башҡортостандың бренды" документаль фильмы күрһәтеләсәк

Алдан хәбәр итеүебеҙсә, 6 сентябрҙә Баймаҡ районы Граф күле янында "Башҡорт аты" этномәҙәни фестивале була. Сара сиктәрендә, "Башҡорт аты - Башҡортостандың бренды" документаль фильмының промо-роликының презентацияһы күрһәтеләсәк. Проект Башҡортостан Республикаһы Башлығы гранттары ярҙамында тормошҡа ашырылған. Ул Башҡортостандың йылҡысылыҡ, ҡымыҙ етештереү һәм халыҡ кәсептәре традицияларын һаҡлауға һәм үҫтереүгә, шулай уҡ башҡорт аты брендын федераль кимәлдә танытыуға йүнәлтелгән. Кино төшөрөү республиканың төрлө райондарында, шул иҫәптән йылҡысылыҡ йолалары айырыуса һаҡсыл һаҡланған Баймаҡ районында барҙы. Алғы планда – башҡорт тәбиғәтенең матурлыҡтары, данлыҡлы башҡорт аты һәм туған тел. Фильмдың айырым ҡиммәтен уның геройҙары – тамашасыларҙы төбәктең йолалары, мәҙәниәте менән таныштырыусы кешеләр бирә. Улар араһында “Ирәндек” этнотурынан Айһылыу Фәйзуллина ҡымыҙ эшләү серҙәре менән уртаҡлаша. Рәсих Йортбәков йәштәрҙе ат спортына йәлеп итеүе, шул иҫәптән джигитовка алымдарын үҙләштереүе тураһында һөйләһә, ә Алмаз Шөғүров үҙенең ҡаҙаныштары һәм ат спортын үҫтереүгә индергән өлөшө тураһында таныштыра. Картинаны ижад итеүҙә шулай уҡ йылҡысылар, ғалимдар, ҡымыҙсылар, көтөүселәр, ат сбруйын эшләүсе оҫталар, ауыл хужалығы тауарҙарын етештереүселәр, тренерҙар һәм ат спорты вәкилдәре ҡатнашҡан. Документаль фильм тамашасыларҙы үҙенсәлекле башҡорт аты менән таныштырыу ғына түгел, ә махсус уҡыу йорттары студенттары, йәш һөнәр эйәләре һәм йылҡысылыҡ, башҡорт йолалары менән ҡыҙыҡһынған һәр кем өсөн дидактик материалға әйләнергә тейеш. Фестиваль ҡунаҡтары фильмдың тәүге кадрҙарын ҡарай һәм уның авторҙарының идеяһы менән яҡынданыраҡ таныша аласаҡ. Иҫегеҙгә төшөрөп үтәйек: “Башҡорт аты” программаһында, йола буйынса, спорт ярыштары, ат парады, театрлаштырылған тамаша, ҡул эштәре күргәҙмәһе, башҡорт эстрадаһы йондоҙҙарының ҙур концерты һәм башҡа бик күп нәмәләр ҡаралған. Һүрәттә: Айһылыу Фәйзуллина Автор фотоһы