Өфөнөң Вуз-ара кампусында Ломоносов исемендәге маршрут булдырылды

Өфөлә Евразия фәнни-белем биреү үҙәге ғалимдары тарафынан әҙерләнгән "Михаил Ломоносов. Донъяға яңыса ҡара" яңы тур старт алды. Уны асыу тантанаһы «Йәштәр һәм балалар» милли проекты ярҙамында төҙөлгән Өфөнөң Вуз-ара студенттар кампусында үтте. Маршрутты тәүгеләрҙән булып Өфө уҡыусылары үтте. Фәнни-популяр тур Фән һәм технологиялар ун йыллығы инициативаһын тормошҡа ашырыу сиктәрендә старт алды. Ломоносов исемендәге фәнни-популяр тур уникаль фәнни-туристик инфраструктура объекттары аша үтә. Уҡыусылар Өфө фән һәм технологиялар университеты лабораторияларында геном технологиялары һәм Өфө дәүләт нефть техник университетының кибер-ательеһында һанлы игеҙәктәр ҡулланып «аҡыллы» кейем булдырыу серҙәре менән танышты. Өфө кампусының алдынғы майҙансыҡтары буйлап экскурсиянан һуң балалар «Торатау» геопаркына - 295-300 миллион йыллыҡ уникаль геологик объектҡа юлланды. Йәш туристар геопарктың визит-үҙәгенә барып, Торатау түбәһенә менеп, шихандарҙың бай тарихы менән танышты. Шихандар һирәк үҫемлектәрҙең уникаль резерваты булып тора, сағыштырмаса ҙур булмаған тауҙар биләмәһендә Башҡортостан флораһының дүрттән бер өлөшө тиерлек осрай. Торатауҙа ғына 904 мең «ҡыҙыл китап» төрө үҫә. «Карбон полигоны» федераль проекты сиктәрендә асылған Евразия ғилми-белем биреү үҙәгенең Климат йорт-музейында уҡыусылар боронғо тау тоҡомдарын күрҙе, меңәр йылдар дауамында климаттың нисек үҙгәреүен, кешеләрҙең ниндәй углерод эҙе ҡалдырыуын һәм уны нисек кәметергә кәрәклеген белде. Донъяның эволюцион үҫеше идеяһы маршруттың бөтә нөктәләрен берҙәм концепцияға берләштерә, ҡатнашыусыларға төрлө фәндәр һәм һөнәрҙәрҙең «сигендә» булырға, уҡытыу, үҫеш һәм күңел асыу өсөн яңы мөмкинлектәр алырға мөмкинлек бирә. "Михаил Ломоносов. Донъяға яңыса ҡара" - Евразия ғилми-белем биреү үҙәге ғалимдары тарафынан Фән һәм технологиялар ун йыллығы инициативаһын тормошҡа ашырыу сиктәрендә эшләнгән туғыҙ фәнни-популяр маршруттарҙың береһе. Яңы туристик маршруттарҙы мәктәп уҡыусыһынан алып алдынғы ғалимға тиклем теләгән һәр кем, шулай уҡ яңы белем алыу менән ҡыҙыҡһынған һәм «фәнгә ҡағылырға» теләгән һәр кем күрә һәм баһалай ала. Экскурсияларға сайтта яҙылырға мөмкин: https://turizm.nocrb.ru/ БЕЛЕШМӘ 2022 йылдан Рәсәйҙә Фән һәм технологиялар ун йыллығы инициативаһын тормошҡа ашырыу сиктәрендә фәнни-популяр йүнәлештәге 80-дән ашыу маршрут әҙерләнгән һәм эшләй башлаған. Турҙар мәктәп уҡыусыларынан алып өлкәндәргә тиклем киң аудитория өсөн хәҙерге фән ҡаҙаныштары, төбәктең тәбиғи һәм мәҙәни мираҫы менән фәнни белем призмаһы аша танышыу өсөн уникаль мөмкинлек аса. Хәтерегеҙгә төшөрәбеҙ, Президент Владимир Путин ҡушыуы буйынса Рәсәйҙә заманса кампустар селтәре булдырыла. 2030 йылға илдә 25 кампустан торған селтәр барлыҡҡа килергә тейеш. Был йүнәлеш буйынса эште Рәсәй Федерацияһы Хөкүмәте һәм Рәсәй Мәғариф һәм фән министрлығы алып бара. Әлеге ваҡытта «Йәштәр һәм балалар» милли проекты ярҙамында 24 ошондай студент ҡаласығы проектлана һәм төҙөлә. 2036 йылға кампустар һаны 40-ҡа тиклем артасаҡ. Башҡортостан заманса кампустар селтәрен булдырыу буйынса федераль проект тормошҡа ашырылған Рәсәйҙең пилот төбәктәренең береһе булды. Өфөлә Евразия ғилми-белем биреү үҙәгенең вуз-ара студенттар кампусының беренсе сираты 2024 йылдың февралендә асылды. Сығанаҡ: https://pravitelstvorb.ru/news/27418/