“Башҡорт аты” фестивалендә үҙ брендтарын тәҡдим итәсәктәр

"Башҡорт аты" халыҡ-ара башҡорт аттарының фестивале сиктәрендә махсус гастрономик зона ойоштороласаҡ. Бында "Башҡортостан продукты" проекты еңеүселәре үҙҙәренең иң яҡшы продукцияһын тәҡдим итәсәк. Сара Баймаҡ районының Граф күле буйында 6 сентябрҙә үтә. – Фестивалдә “Башҡортостан продукты” проекты еңеүселәребеҙ республикала етештерелгән продукцияның төрлөлөгөн күрһәтә аласаҡ. Был урындағы тауар етештереүселәргә ярҙам ғына түгел, ә фестиваль ҡунаҡтарына төбәгебеҙҙең үҙенсәлекле зауыҡтары менән танышыу мөмкинлеге лә, - тип билдәләне Башҡортостандың сауҙа һәм хеҙмәттәр министры вазифаһын башҡарыусы Василий Таболин. Шулай итеп, ауыл хужалығы тауарҙары етештереүселәрҙең күргәҙмә-йәрминкәһендә Күмертау, Белорет, Салауат, Стәрлетамаҡ ҡалаларынан, шулай уҡ Баймаҡ, Мәләүез, Белорет, Учалы һәм Кушнаренко райондарынан “Башҡортостан продукты” проекты еңеүсеһенең 11-е үҙҙәренең тауарҙарын тәҡдим итә. Фестивалгә килеүселәр төрлө продукция ассортиментын ҡарай аласаҡ: йылҡы итенән эшләнгән деликатестарҙы, һөт һәм әсетелгән һөт, икмәк-булка һәм сыр ризыҡтарын, бал, сәй, ҡайнатмалар, пихта һыуы һәм сувенирҙар. Гастрономия зонаһын шулай уҡ Өфө, Белорет, Благовещен, Сибай, Хәйбулла һәм Баймаҡ райондарының дөйөм туҡланыу учреждениелары күрһәтәсәк. Фестиваль ҡунаҡтары урындағы продукцияны ҡулланып әҙерләнгән аутентик башҡорт ризыҡтарын ғына түгел, ә Корея һәм Кавказ кухняһы ризыҡтарын да баһалай аласаҡ. Автор фотолары