Төрээн дылым дөзүн тура тыртып каапты!
“Төлдеринге “Үжүглелди” өөретпес!” - дээн.
“Хоруваан бис! - бөлгүмнерге өөрензиннер,
Хостуг шакта ойнап-хөглеп шиңгээтсин!" - дээн.
“Үжүглелди” бирги класска өөретпеске,
Үрезинни черже чажып, тарываан боор...
Хөрзүнүнче хөгбээн чемиш дазыл чокка
Хөлбеңнедир частып кээр бе? Ол-даа меге!
Тыва дылым дыка чараш хөөн-түрүн
Тыва чаштар сеткилинден хооруп кагды!
“Арай деп-ле чаңгыс шакты бердивис чоп!
Ада-ие чөпшээрезе - өөрениңер!!!”
Тыва дылда тынып чоруур кижи канчаар?
Тыва дылын ыдыктавайн чүнү алгаар?
Тыва дылдың келир өйү төнген ол бе?
Тыва дылды камгалап аар харык чок бе?
Тыва дылым кызагдаткан - кээргенчиг-дир!
Тыва дылдыг чонум-хөйүм - кээргенчиг-дир!
Тыва дылын уттур чаштар - кээргенчиг-дир!
Тыва дылым дыңналбайн баар - кээргенчиг-дир!
Тыныш безин бачыдай бээр, харлыга бээр,
Дыңнааш безин бүзүревес, шынга албас.
Дыл чок болза, ындыг дылдыг чон-даа чидер
Дыл чок чонну чон деп адап диттигер бе?
Төрээн дылым дөзүн тура тыртып каапты!
“Төлдеринге “Үжүглелди” өөретпес!” - дээн.
“Хоруваан бис!” - бөлгүмнерге өөрензиннер,
Хостуг шакта ойнап-хөглеп шиңгээтсин! - дээн.
ОрланДамба-Хуурак.
30.08. 2025 чыл.