Һөйөү менән баҡһаң...

Республикала ҡурай түңәрәктәре, ансамблдәре, кластары булдырылған һәм уңышлы шөғөлләнгән өлгө булырлыҡ район-ҡалаларыбыҙ бар. Уларҙың береһе – Баҡалы районы. Ҡурайһыҙ башҡорт халҡын ғына түгел, Башҡортостанды ла күҙ алдына килтереүе мөмкин түгел. Милли музыка ҡоралының популярлығы шул тиклем ҙур: унда оло йәштәгеләр ҙә, йәш музыканттар ҙа уйнай, ҡулдарынан төшөрмәй. Яугирҙәребеҙ яуға ла ҡурай менән китә. Тап ошо ғәжәйеп музыка ҡоралының һоҡландырғыс тауышы Баҡалынан бер егетте Октябрьский музыка училищеһына алып килә. Ә инде бер нисә йылдан ҡулына музыкант дипломын алған йәш белгес һис икеләнеүһеҙ ул тыуған яғына ҡайта һәм район мәҙәниәт һарайында хеҙмәт юлын башлай. Етәксенән уңдылар 25 йыл дауамында Рөстәм Ханнанов республика һәм район концерттарында ҡатнаша. Бер мәл Рөстәм Марс улы, оҫталыҡ менән уртаҡлашырға ваҡыт етеүен аңлап, фекерҙәштәр төркөмөн йыя, сөнки музыка ҡоралында уйнау ғына аҙ – уны яратырға ла кәрәк. Был һыҙатты етәксе уҡыусыларында ла тәрбиәләй. Баҡалы районында “Азамат” ҡурайсылар ансамбле 2004 йылда ойошторола. Уның составына 14 йәшлек 14 ҡатнашыусы инә. Ансамблдең репертуары башҡорт халыҡ көйҙәренән, марштарҙан, башҡорт бейеү әҫәрҙәренән тора. КоллективетәксеһеРөстәмХаннановтың тәжрибәһе лә, абруйы ла ҙур – Баҡалы районы хакимиәтенең, Республика халыҡ ижады үҙәгенең, республика Мәҙәниәт министрлығының Почет грамоталары менән бүләкләнгән, “Башҡортостандың атҡаҙанған мәҙәниәт хеҙмәткәре” тигән маҡтаулы исемгә лайыҡ булған. Ансамбль ижады эшмәкәрлек йылдарында урында ғына түгел, ситтә лә популярлыҡ яулай. Кллектив Бөтә Рәсәй һәм республика конкурстарында, фестивалдәрҙә әүҙем ҡатнаша һәм еңеүҙәргә өлгәшә. Ансамблдең репертуарында “Азамат”, “Сәлимәкәй”, Урал”, “Иҫке Урал” кеүек башҡорт халыҡ көйҙәренә иғтибар ҙур, шулай уҡ бейеү, попуррикеүек көйҙәрҙе лә яратып башҡаралар. Әгәр һөйөү менән баҡһаң... Эшеңде яратып, күңелеңде биреп башҡарһаң ғына, юғары уңыштарға өлгәшергә мөмкин. Әгәр һөйөү менән баҡһаң, тылсымлы ҡурай ҙа һине күктәргә сөйәсәк. Шуғалыр ҙа ансамбль ағзаларының да ҡурайға ҡарата яҡшы мөнәсәбәте яңынан-яңы еңеүҙәргә илтә. Йөрөгән таш шымара, тигәндәй, Баҡалы ҡурайсылары һәр сарала ҡатнашырға тырыша. Был йәһәттән Рөстәм Ханнанов үҙе лә өлгө күрһәтә. Мәҫәлән, 2017 йылда Зәлиә менән Рөстәм Ханнановтарҙың музыкаль ғаиләһе Ҡариҙел районы Ҡариҙел ауылының “Шәжәрә байрамы” республика халыҡ байрамында “Ғаиләм – минең ҡәлғәм” халыҡ ижады конкурсында ҡатнашып, беренсе урынды яулай. 2020 йылда Салауат районының Малаяҙ ауылында уҙған В. Шөғәйепов исемендәге “Тылсымлы ҡурай” асыҡ ҡурайсылар онлайн-конкурсында “Азамат” ҡурайсылар ансамбле беренсе дәрәжә лауреат дипломына лайыҡ була.Ошо уҡ бәйгелә Рөстәм Ханнановтың улы Азамат иһә Гран-при яулай. Атаһынан күргән уҡ юнған Музыкаль ғаиләнең йолаларын дауам итеп, Азамат ата-әсәһенән ҡалышмай һәм уларҙы үҙенең уңыштары менән даими ҡыуандырып тора. Мәҫәлән, 2021 йылдың мартында ул Өфө ҡалаһында уҙған III Бөтә Рәсәй “Ракета” балалар, үҫмерҙәр һәм өлкәндәр ижады фестиваль - конкурсында ҡатнаша, беренсе дәрәжә лауреат диломы менән бүләкләнә. 2021 йылда Азамат һәм Рөстәм Ханнановтар, Октябрьский ҡалаһында Ғата Сөләймәнов исемендәге “Бәйге” республика ҡурайсылар конкурсында дуэт булып сығыш яһап, өсөнсө һәм икенсе урындарҙы яулай. 2023 йылда ошо уҡ бәйгелә ансамбль – беренсе, солисы Азамат Хананнов икенсе урынға лайыҡ була. Ансамбль өсөн 2024 йыл да уңышлы үтә. Айрат Ҡобағошов исемендәге Башҡорт музыка ҡоралдарында башҡарыусыларҙың асыҡ район конкурсында ҡатнашып, беренсе урынға сығалар, ә Азамат Ханнанов икенсе урынды яулай. Ошо уҡ йылда ансамбль солисы Өфө ҡалаһында уҙған Ғата Сөләймәнов исемендәге башҡорт халыҡ музыка ҡоралдарын башҡарыусыларҙың асыҡ зона конкурсында ҡатнашып, беренсе дәрәжә диплом лауреаты була. Шулай уҡ Октябрьский ҡалаһы Ғата Сөләймәнов исемендәге XXIII республика ҡурай байрамында “Азамат” ҡурайсылар ансамбле – беренсе, ә Азамат Ханнанов өсөнсө урынды яулай. Быйыл Азамат Ханнанов Башҡортостандың атҡаҙанған мәҙәниәт хеҙмәткәре Мөхәмәт Түлебаев призына II “Ҡурай сере” ҡурайсылар конкурсының “Солистар” номинацияһында икенсе урынға лайыҡ була. Шулай уҡ апрелдә Өфөлә үткән “Айрат Ҡобағошов исемендәге башҡорт халыҡ музыка ҡоралдарында башҡарыусыларҙың асыҡ район конкурсында баҡалыларҙың ҡурайсылар ансамбле (етәксеһе – Рөстәм Ханнанов, концертмейстеры – Зәлиә Ханнанова) III дәрәжә лауреат була. Ансамбль солисы Элина Алтынбаева икенсе урынды яулай, ә Азамат Ханнанов Гран-приға лайыҡ була. Шулай итеп, Баҡалы ауылындағы “Азамат” ҡурайсылар ансамбле мәртәбәле конкурстарҙа әүҙем ҡатнаша һәм, тыуған райондарын данлап, һәр саҡ еңеүҙәр менән ҡайта. Лайыҡлы алмаш үҫтергән. Рөстәм Ханнановҡа “Афарин!” тип әйтергә генә ҡала. Фото: “Азамат” ҡурайсылар ансамбле архивынан.