Халыҡты ылыҡтырыр үҙәккә әйләнә

Башҡортостанда мәҙәниәт тармағы ҙур йәнлелек менән үҫешеүен дауам итә, һәм был төрлө йүнәлештәрҙә сағыла. Үҫеш республика етәкселегенең бында йәшәгән халыҡтарҙың мәҙәниәтен, телен, тарихын һаҡлау һәм өйрәнеүгә етди иғтибар бүлеүенә лә бәйле. Ыңғай күренештәрҙең дәүләт булышлығынан тыш килеп сыға алмаҫы һәр кемгә асыҡ. Бәхеткә күрә, республика етәксеһе Радий Хәбиров халыҡтың күңел ихтыяждарын ҡәнәғәтләндерер тармаҡҡа даими иғтибар күрһәтә, уның шәхси башланғыстары әллә күпме яҡшы үҙгәрешкә нигеҙ һалды. Башҡортостан Башлығы Мәҙәниәт һәм сәнғәтте үҫтереү мәсьәләләре буйынса советтың тәүге ултырышында һүҙ тотҡанда: “Хәҙерге ваҡытта тап мәҙәниәт һәм әхлаҡи ҡиммәттәр йәмғиәтебеҙҙең төп нигеҙе булып тора”, – тигәйне. Һәм ошо нигеҙҙе нығытыу бурысын атҡарыуға ул туранан-тура ҡатнашлыҡ күрһәтә, республикабыҙ буйлап яңы мәҙәни объекттар асыла тора, электән эшләп килгәндәренә капиталь ремонт үткәрелә. Стәрлебаш районы Первомайский ауылы ла – республика етәкселегенең даими хәстәрлегенә асыҡ дәлил. Бында Башҡортостаныбыҙҙа барған Армия мәҙәниәте көндәре ваҡытында тантаналы рәүештә яңы мәҙәниәт йорто асылды. Унда видеобәйләнеш аша республика етәксеһе Радий Хәбиров та ҡатнашты. Был көн ауыл халҡы өсөн ысын байрамға әүерелә, ни өсөн тигәндә, быға ҡәҙәр улар оҙаҡ йылдар клубһыҙ йәшәй. Шулай булыуға ҡарамаҫтан, Первомайскийҙа ижади берләшмәләр эшләп килгән. Үҙ клубтары булмағас, һәүәҫкәр артистар район үҙәгендә йыйылырға мәжбүр булған. Ошондай ҡыҫынҡылыҡҡа ҡарамаҫтан, коллективтар райондың мәҙәни тормошонда әүҙем ҡатнашып, ярайһы уңыштарға ла өлгәшеп килгән. Хәҙер инде Первомайский ауылын тирә-яҡҡа йәм биреп, үҙенә саҡырып торған модель клуб бинаһы биҙәй. Күләмле эштәрҙе башҡарып сығыуға республика бюджетынан аҡса бүленгән. Бинаны асыу тантанаһында Стәрлебаш районы хакимиәте башлығы Рөстәм Рахманғолов: – Был үҙәк Первомайский һәм яҡын-тирәләге ауылдар халҡы өсөн әһәмиәтле урынға әйләнә. Республика етәкселегенә төҙөлөшкә күрһәткән ярҙам өсөн рәхмәт белдерәбеҙ, – тип халыҡтың ҡыуанысын еткерҙе. Мәҙәниәт йорто заманса итеп төҙөлгән, уның бүлмәләре күп функциялы. Мәҫәлән, тамаша залындағы креслоларҙы бүтәнсәрәк итеп ҡуйып, уны конференциялар залына, хатта бәләкәйен булһынмы, ҙурынмы – төрлө саралар үткәрергә мөмкинлек биргән урынға әйләндерергә мөмкин. Мәҙәниәт йортонда уңайлыҡтар булдырылған: яҡты, ҙур сәхнәһе, гардероб, грим, санитар бүлмәләре бар, йылытыу системаһы үҙәкләштерелгән. Бинала шулай уҡ видеокүҙәтеү ҙә ҡуйылған, был инде кешеләргә үҙҙәрен хәүефһеҙлектә тойоу хисе бирә. Хәҙер первомайҙар тотош ғаилә менән килеп, концерт, башҡа тамашалар ҡарарлыҡ, күңелдәренә ятҡан шөғөл дә таба алырлыҡ урынға эйә булды. Ваҡыт үтә килә, заманса мәҙәниәт йорто ауылдаштарҙы, тирә-яҡ кешеләрен бергә туплай торған, таланттарҙы асҡан үҙәккә лә әйләнеп китер әле. ФЕКЕР Стәрлебаш район мәҙәниәт һарайы директоры Венера ЛАТИПОВА: – Бер нисә йыл элек республикабыҙ етәксеһе Радий Фәрит улы Хәбиров эш сәфәре менән районыбыҙҙа булғанда, Первомайскийҙы ла барып күрҙе. Ул саҡтағы клуб ныҡ иҫке, авария хәлендә ине. Халыҡ уға яңы клуб төҙөү үтенесен еткерҙе. Ул шунда уҡ был мәсьәләне контролгә алды. Һәм вәғәҙәһендә торҙо: һанаулы ғына йыл үтте, Первомайский өр-яңы, заманса итеп төҙөлгән, уңайлыҡтары булған мәҙәниәт йортона эйә булды. Радий Фәрит улына мәҙәни тармаҡҡа, халыҡтың ихтыяждарына итибарлы булғаны өсөн ҙур рәхмәт әйтәбеҙ. Первомайский халҡы берҙәм, дәртле, яңы мәҙәниәт йорто уларға дәртләнеп ижад итеү, сараларҙа ҡатнашыу мөмкинлеге тыуҙыра. Ижади берләшмәләр өсөн дә үҙ бинаң булыуы ғәйәт ҙур өҫтөнлөктәр бирә. Яңы мәҙәниәт йорто һәр кемде үҙенә тартып торған бер үҙәккә әйләнеренә шик юҡ. Бына оҙаҡламай беҙ бында тәүге ҙур сараны – район таланттары ҡатнашлығында хәйриә концерты үткәрергә йыйынабыҙ. Унан килгән аҡса махсус хәрби операциялағы яугирҙәргә ярҙамға тотоноласаҡ. Һүрәттәрҙә: Первомайский ауылын хәҙер ошондай заманса клуб бинаһы биҙәй; асыу тантанаһында; Венера Латипова.