Өфөлә “Өмөт” эш башланы

Билдәле булыуынса, хоспистарға ярҙам итеү маҡсатында ойошторолған “Өмөт” хәйриә фонды дүрт йыл элек мөһим проектты тормошҡа ашырыуға тотондо: илдең төрлө төбәктәрендәге, ҡалаларындағы төрлө тармаҡ лидерҙары “Социаль үҙгәрештәр буйынса кәңәшселәр институты” программаһына ярашлы белем ала. Ошо көндәрҙә сираттағы уҡыу майҙансығы Өфөлә эш башланы. Фондты ойоштороусы – Рәсәйҙең билдәле йәмәғәт эшмәкәре Нюта Федермессер. Уның әйтеүенсә, Башҡортостан мөһим проекттың дүртенсе модулен тормошҡа ашырыу майҙансығы итеп юҡҡа ғына һайланмаған. Республикала социаль мәсьәләләргә ҙур иғтибар бүленә, шул уҡ ваҡытта беҙҙә “Социаль үҙгәрештәр буйынса кәңәшселәр институты” программаһын үткәндәрҙең берләшмәһе булдырылған. Сығарылыш белгестәре араһында, мәҫәлән, М. Аҡмулла исемендәге БДПУ колледжы директоры Анна Таболина республиканың башҡа студенттары менән берлектә “Өйгә ҡайтайыҡ. Балалар ғаиләнән ситтә йәшәмәһен өсөн” тигән проектты тормошҡа ашырған. – Белем биреү программаһының маҡсаты – урындарҙа алға ҡарап эшләгән ныҡлы командалар булдырыу. Дәүләт власы органдарының, социаль яуаплы бизнестың, коммерцияға ҡарамаған ойошмаларҙың, журналистарҙың уртаҡ маҡсатта берҙәм хеҙмәт күрһәтеүенә өлгәшергә теләйбеҙ, – тине киң мәғлүмәт хеҙмәткәрҙәре менән һөйләшеүҙә Нюта Федермессер. - “Социаль үҙгәрештәр буйынса кәңәшселәр институты” ярҙамында илдең төрлө төбәктәрендә ошондай командалар барлыҡҡа килде, улар һөҙөмтәле эш алып бара. Мәҫәлән, Башҡортостандан тыш, Новосибирск, Түбәнге Новгород ҡалаларында, Алтай крайында, Санкт-Петербургта һәм Ленинград өлкәһендә эксперттар берләшмәләре булдырылды. Улар бер-береһенә ярҙамлашып, халыҡ мәнфәғәттәрен ҡайғыртып, киң эш алып бара. Һөҙөмтә, әлбиттә, тиҙ генә күренмәйәсәк – ҡатмарлы хеҙмәт киләсәкте хәстәрләүгә йүнәлтелгән. Нюта Федермессер әйтеүенсә, ул республика менән 2019 йылда – Өфө хосписы булдырырға ҡарар иткәндә – тығыҙ бәйләнештә эшләй башлаған. – Өфөләге хоспис республика етәксеһе Радий Хәбировтың, уның ғаиләһенең төп эштәренең береһенә әйләнде. Каринэ Владимировна учреждение табиптарын, пациенттарын да, уларҙың мохтажлыҡтарын да яҡындан белә, күп ваҡытын шунда үткәрә. Был һоҡланғыс күренеш! Ошо тәжрибәне башҡа төбәктәргә лә таратырға кәрәк, – ти “Өмөт” хәйриә фонды етәксеһе Нюта Федермессер. – Башҡортостанда электән килгән үҙенсәлекле булышлыҡ ысулы – хәйер биреү ҙә бар. Кешегә, һорамаһа ла, ярҙам күрһәтеү ул. Илебеҙҙә паллиатив ярҙам тап шундай булырға тейеш. “Социаль үҙгәрештәр буйынса кәңәшселәр институты”н үҫтереүгә республиканың ғаилә, хеҙмәт һәм халыҡты социаль яҡлау министры Ленара Иванова ла ҙур өлөш индерә. Дәүләт менән коммерцияға ҡарамаған ойошмалар вәкилдәрен уртаҡ маҡсатта берләштереү мөһим, тип билдәләй ул. Ленара Хәким ҡыҙы программаның дүртенсе модулен тормошҡа ашырыуҙа ла ҡатнашып, Башҡортостанда социаль өлкәнең үҫеше хаҡында һөйләйәсәк. Планлаштырылғанса, “Социаль үҙгәрештәр буйынса кәңәшселәр институты” тыңлаусылары Өфөләге “Мәрхәмәт” хәйриә фонды эшмәкәрлеге менән танышасаҡ. Билдәле булыуынса, унда етем һәм инвалид балаларға төрлө яҡлы ярҙам күрһәтелә. Шулай уҡ Менталь сәләмәтлек үҙәгенә, “Салют” реабилитация комплексына, Республика клиник психиатрия дауаханаһына, Өфө хосписына барып, программала ҡатнашыусылар сирлеләргә булышлыҡ итеү барышын ҡараясаҡ, һөҙөмтәле ысулдарҙы күрәсәк. Курстарҙа дәүләт власының төрлө кимәлдәге вәкилдәре менән хеҙмәттәшлек алымдарын, төбәктәге социаль үҙгәрештәрҙе анализларға өйрәтеү ҙә ҡаралған. Фотола: фонд етәксеһе Нюта Федермессер. Автор фотоһы.