“Телешко” һынатманы

Ошо көндәрҙә Мәскәүҙә уҙғарылған ХХ ”Ҡушыл 2.0” Бөтә Рәсәй балалар медиаһы фестивалендә “Телешко” медиамәктәбе дүрт наградаға лайыҡ булып, юғары әҙерлек кимәлен йәнә бер тапҡыр раҫланы. Мәғлүм булыуынса, сараны Милли телерадиотапшырыусылар ассоциацияһы ойошторҙо. “Телешко” мәктәбе директоры Рөстәм Атнабаев ниндәй номинацияларҙа өфөләргә еткәндәр булмауы тураһында һөйләне. “Барыһын да белгем килә” номинацияһында “Башҡорт ризыҡтары әлифбаһы” проекты еңеүсе тип танылды. Программаның 21-се сығарылышы Башҡортостан Башлығы гранттары фонды ярҙамында “Эйе” блогерҙар командаһы” проекты нигеҙендә барлыҡҡа килгән. Унда үҫмерҙәр тамашасыларҙы Башҡортостандың йолалары һәм аш-һыу мираҫы менән таныштыра. Йәнә бер номинация – “Киноһәүәҫкәр”. Өлкән жюри фекеренсә, унда “Ҡараш” тип аталған ҡыҫҡа метражлы фильмы еңеүсе тип танылды. Дуҫлыҡ тураһындағы фильм үҫмерҙәр психологияһын тәрән аңлап, сағыу йөкмәтке менән һуғарылған. Режиссеры – Ульяна Илистанова, оператор-ҡуйыусыһы – Вадим Ғилметдинов. Авторҙарҙың икеһе лә Х класты тамамлаған. “Йылғаларға барғым килә” тип аталған яңы номинацияла балалар жюрийы “Тере һыулы күл” проектын еңеүсе тип баһаланы. Авторы – Кирилл Рабогашвили. Ул Башҡортостандағы Шүлгәнташ мәмерйәһендәге ер аҫты күленә арналған. Фестивалдең өр-яңы конкурсы – ТВ-форматтар питчингы. “Ҡабатлаусылар” телепроекты беренсе урынға лайыҡ булды. Жюри хөкөмөнә бөтә Рәсәйҙәге медиастудияларҙан 20 идея сығарылғайны. Валерия Дәүләтова-Григорова менән София Иванова тәҡдим иткән “Телешко” идеяһы абсолют еңеүсе тип танылды. Сара күңел асыу форматында. Ике алып барыусы Рәсәйҙең рекордтар китабына ингән рекордтарҙы ҡабатларға тырыша. Идея жюри ағзаларын актуаллеге, ижадилығы һәм ҡыҙыҡлы булыуы менән таң ҡалдырҙы. Әйткәндәй, “Ҡушыл 2.0” фестивале – балалар һәм үҫмерҙәр медиаһы өлкәһендә күләмле бөтә Рәсәй сараһы. Быйыл ул бөтә илебеҙҙән 500-ҙән ашыу ҡатнашыусыны берләштереп, иң яҡшы медиапроекттарҙы үҙенә йыйҙы. Фото: “Телешко” медиамәктәбенең “Бәйләнештә”ге төркөмөнән.