Ҡағыҙ һәм ағас киҫәктәренән – ат һыны!

Бүздәк районының һәләтле рәссамы Рәдис Ғайнанов ябайлыҡтан матурлыҡ тыуҙырған. “Бәлешфест-2025” фестивалендә яҡташтарына ошондай һоҡланғыс эшен тәҡдим иткән. Оҫта ҡулдары менән булдырылған арт-объект байрамдың биҙәгенә әүерелә. Бик күптәр уның эргәһенә туҡталып ҡыҙыҡһынып ҡарай, иҫтәлеккә фотоға ла төшә. Рәдис Ғайнанов - ябай ғына әйберҙән матурлыҡ тыуҙыра белгән һәләтле рәссам. Үҙенең яҡташтарын да тәүгә һоҡландырмай. Был юлы ул кәрәкмәгән, ҡулланылған материалдарҙан ошондай һоҡланғыс ат һынын эшләп ҡуя. Ағас киҫәктәренән каркасын төҙөһә, ҡалған өлөшөн яһау өсөн кәрәкмәгән гәзиттәрҙе, ҡағыҙҙы ҡуллана. Был скульптура өҫтөндә рәссам бер үҙе эшләй. Ҡатмарлы ла, ентекле лә эште тулыһынса үҙ ҡулдары менән башҡарып сыға. – Матурлыҡты бөтә ерҙән дә табырға булыуын ошо эшем аша күрһәтергә теләнем. Ғәҙәти генә, кәрәкмәй тип уйлаған нәмә лә гүзәллек сығанағы була ала. Ат көстө, сыҙамлыҡты, егәрлелекте, тәбиғәт матурлығын сағылдыра. Ошондай экологик материалдар ҡулланып был образды булдыра алыуым менән ҡәнәғәтмен, – ти рәссам. Рәдис Ғайнанов туғыҙ йәштән һүрәт төшөрөү менән ҡыҙыҡһына башлай. Тәүҙә район мәҙәниәт һарайындағы художество түңәрәгенә йөрөй, һуңынан балалар сәнғәт мәктәбендә белем ала. Туғыҙынсы кластан һуң Өфөләге 6-сы художество лицейында уҡый. Хатта армияла ла уға картиналар яҙыу мөмкинлеге була. Һалдат хеҙмәтенән һуң тыуған яғына ҡайта, район мәҙәниәт һарайына эшкә урынлаша. Бөгөнгө көндә лә унда рәссам булып хеҙмәт итә. Үҙенең йүнәлеше буйынса юғары уҡыу йортон да тамамлай. Районда уның күргәҙмәләре даими ойошторолоп тора. –Эштәрем янында фотоға төшһәләр йәки балалар ҡыҙыҡһынып төшөргән геройҙарымды ҡараһа, был минең өсөн ҙур шатлыҡ. Матурлыҡты төрлө ерҙә күрергә мөмкин, бары тик уның барлыҡҡа килеүенә юл асырға ғына кәрәк, – тигән фекерҙә ул. Фото: райондың татар тарихи-мәҙәни үҙәге архивынан.