Беҙҙекеләрҙә – өс алтын һәм бер көмөш миҙал

Ошо көндәрҙә Түбәнге Новгород өлкәһенең Дзержинск ҡалаһында “Ватанды һаҡлаусылар кубогы” төбәк-ара комплекслы физкультура сараһын ябыу һәм еңеүселәрҙе бүләкләү тантанаһы булды. Унда Волга буйы федераль округының 14 төбәгенән 130 махсус хәрби операция ветераны ҡатнашты. Турнирҙы “Ватанды һаҡлаусылар” дәүләт фонды, Рәсәйҙең Паралимпия комитеты һәм Түбәнге Новгород өлкәһе хөкүмәте ойошторҙо. “Ватанды һаҡлаусылар кубогы” махсус хәрби операция ветерандарын физик һәм психологик реабилитациялауға, уларҙың һаулығын нығытыуға һәм социаль яраҡлаштырыуға, шулай уҡ спортты һәм сәләмәт тормошто популярлаштырыуға йүнәлтелә. Башҡортостан командаһы сарала уңышҡа өлгәште. Волейбол командаһы ярыштың көмөш призеры булды. Өҫтәл теннисында яугирҙәребеҙ өс алтын миҙал яуланы. Өфөнән Дмитрий Феликсов, Стәрлетамаҡтан Владимир Егоров һәм Шишмә районынан Рауил Шәңгәрәев чемпион исеменә лайыҡ булды. Владимир Егоров фондтың төбәк филиалы үткәргән йәмәғәт һәм спорт сараларында әүҙем ҡатнаша. Ул шулай уҡ Стәрлетамаҡ ҡалаһы буйынса МХО ветерандары ассоциацияһы рәйестәше лә. “Ошондай күләмдәге сараларҙа ҡатнашыу мөмкинлеге биргән өсөн “Ватанды һаҡлаусылар” фондына, тренерҙарға һәм ярыш барышында эргәмдә булған, миңә ярҙам иткән егеттәргә рәхмәтлемен”, – ти Владимир Егоров. “Ватанды һаҡлаусылар” фондының Башҡортостандағы филиалы етәксеһе Гөлнур Ҡолһарина ветерандарҙы уңышлы сығыштары менән ҡотланы һәм сараны ойоштороусыларға рәхмәт әйтте. Әйткәндәй, республика командаһының кураторы – дүрт тапҡыр Паралимпия уйындары чемпионы, Рәсәйҙең атҡаҙанған спорт мастеры, РФ Спорт министрлығы ҡарамағындағы МХО-ла ҡатнашыусылар араһында спортты үҫтереү буйынса йәмәғәт советының эш төркөмө рәйесе, Рәсәй Паралимпия комитеты президенты советнигы Ирек Зарипов. Фото: “Ватанды һаҡлаусылар” фонды БР филиалының матбуғат хеҙмәте.