Өфөлә Армия мәҙәниәте көндәренә ярашлы Юрий Сивачевтың “Беҙҙең дәүер геройҙары” һәм Сергей Марченконың ”Донбасс күмере. Еңеү йөҙҙәре” экспозициялары асылды. Армия мәҙәниәте көндәренең матбуғат хеҙмәтенән хәбәр итеүҙәренсә, ике күргәҙмә лә Башҡорт дәүләт опера һәм балет театрына ҡуйылған. Ҡайһы бер эштәр МХО зонаһында башҡарылған этюдтарҙан ғибәрәт. Икенселәре - яугирҙәрҙең, ирекмәндәрҙең, ветерандарҙың портреттары. "Беҙҙең проект МХО-нан күп саҡрымдар алыҫлыҡта йәшәгән рәсәйҙәрҙең картиналарыбыҙҙағы геройҙарҙың күҙҙәренә ҡарап, был кешеләрҙең ни өсөн унда булыуын, улар кемдәр икәнен аңлаһын, уй-фекерен “күрһен”, уларҙың тауышын “ишетһен” һәм уларға ярҙам итергә теләктәре барлыҡҡа килһен өсөн булдырылған”, - тип билдәләне Сергей Марченко. Уның күсмә экспозицияһында хәрбиҙәрҙең - шағир-фронтовик Сергей Лобановтың, яҙыусы Захар Прилепиндың һәләк булған водителе Александр Шубиндың (“Злой”) - портреттары ҡуйылған. Юрий Сивачевтың күргәҙмәһендә Башҡортостандан МХО-ла ҡатнашыусылар - йырсы Әлфир Замановтың, актер Илнур Сәфәровтың, артистар Фларид һәм Фидан Бирғәлиндәрҙең портреттарын күрергә мөмкин. Рәсәй Ҡораллы Көстәренең мәҙәниәтен популярлаштырыуға индергән шәхси өлөшө өсөн Сергей Марченкоға тантанала РФ Оборона министрлығының “Художник Греков” миҙалы тапшырылды. Башҡортостандың мәҙәниәт министры Әминә Шафиҡова фекеренсә, Башҡортостанда рәссамдарҙың ижадын күберәк кеше беләсәк, ә экспозициялар Армия мәҙәниәте көндәренең сағыу ваҡиғаһы буласаҡ. "Махсус хәрби операция темаһы форумдың бөтә сараларында сағылыш таба. Беҙ тарихи факттарҙы иҫкә төшөрәбеҙ, Бөйөк Ватан һуғышы тураһында хәтерҙе хөрмәт итәбеҙ. Ә МХО бөгөн йәрәктәрҙе асты. Һәр беребеҙ үҙ көсөнә ҡарап Рәсәй сиктәрен һаҡлаусы егеттәргә ярҙам итер, тип ышанам”, — тип һыҙыҡ өҫтөнә алды министр. Мәғлүмәт: https://resbash.ru/news/obshchestvo/2025-08-22/v-ufe-voennye-hudozhniki-pokazali-litsa-pobedy-4358486