Премьер-министр Андрей Назаров Баймаҡ районына барҙы

Баймаҡ районы – республикалағы ҙур муниципалитеттарҙың береһе. Уның биләмәһе 563 мең гектарҙан ашыу тәшкил итә. 351 мең гектарҙан ашыуы – ауыл хужалығы ерҙәре. Урман фонды 158 меңдән ашыу гектар ерҙе биләй. Ауыл хужалығы ерҙәренең 251 мең тирәһе гектары – дәүләт һәм муниципаль милектә, 84,3 мең гектары – шәхси милекселәрҙеке. Премьер-министр Баймаҡ районындағы Айрат Шәрәфетдинов етәкселек иткән, Баймаҡ районындағы иң уңышлы крәҫтиән (фермер) хужалыҡтарының береһенең ерҙәрендә булды. Әйткәндәй, Айрат Алик улы ғүмерен тыуған ерендә ауыл хужалығын үҫтереүгә арнаған. Уның хужалығы үҫемлекселек – бойҙайҙың ҡаты, йомшаҡ төрҙәрен үҫтереү менән шөғөлләнә. Иген һаҡлау өсөн иген ырҙыны бар. Ул 2003 йылдан улдары менән эшҡыуарлыҡ эшмәкәрлеге менән мәшғүл. Осрашыуҙа Андрей Назаров Баймаҡ районының Урал аръяғы зонаһындағы ауыл хужалығы продукцияһының 20 проценты тирәһен етештереүе һәм республикала ауыл хужалығы ерҙәре майҙаны буйынса иң әйҙәүсе урындарҙың береһен биләүе тураһында әйтте. Муниципалитет иген етештереү, һыйыр һәм ат һаны, һөт етештереү буйынса – лидерҙар иҫәбендә. Фермер хужалығы ерҙәрен ҡарағандан һуң, Премьер-министр Баймаҡ районының, шул иҫәптән ошо фермер хужалығының республиканың аграр сәнәғәте комплексы үҫешенә ҙур өлөш индереүе тураһында белдерҙе. Крәҫтиән (фермер) хужалығының етештереү һәм финанс күрһәткестәре үҫә, ауыл хужалығы продукцияһын етештереү һәм һатыу күләме арта. Артабан төбәк Премьер-министры Андрей Назаров “Богдан” аграр фирмаһында булды. Унда “Күлтабан” мегафирмаһын киң үҙгәртеп ҡороу бара. Аграр фирма етәксеһе Алексей Комаровских хужалыҡ биләмәһен күрһәтте, ауыл хужалығы етештереүе үҫеше йәһәтенән пландар менән уртаҡлашты. 2024 йылда аграр фирма 2425 тонна һөт етештергән, бер һыйырға уртаса һауым 5900 килограмм тәшкил иткән. 749, шул иҫәптән 336 һауын һыйыры бар. Инвестиция проекты эске баҙарҙы сифатлы ауыл хужалығы продукцияһы менән тәьмин итергә, Ураль аръяғының ер ресурстарының инвестиция йәлеп ителеүсәнлеген арттырыуға, заманса һыу һибеү системаһы проектын тормошҡа ашырыуға булышлыҡ итәсәк. Әйткәндәй, быйыл 23 майҙа Баймаҡ районында Премьер-министр Андрей Назаров етәкселегендә республика Хөкүмәтенең күсмә кәңәшмәһе булды. Унда райондың социаль-иҡтисади үҫешенең төп аспекттары тураһында һөйләшкәйнеләр. - Республика баҫыуҙарында урып йыйыу башланды, уңышты юғалтыуһыҙ йыйып алырға кәрәк. Баймаҡ районы – ауыл хужалығы буйынса лидерҙарҙың береһе, шуға баҫыуҙарға бергәләп сығыу урын итеп һайланды ла. Райондың 95 йыллыҡ юбилейы алдынан бындағы ауылдарҙа йәшәүселәрҙең ҡатмарлыҡтарына айырыуса иғтибар итергә кәрәк. Кешеләрҙең күңел биреп эшләүе күренә, урында йәшәүселәр егәрле, фермерҙар республиканың уларҙың эшҡыуарлығына, эшмәкәрлегенә мөнәсәбәтте күрә, шуға тыуған ерендә эшләй. Эшлекле сәфәр буйынса шуны әйтке килә: ер – ҡиммәтле актив. Уның буйынса айырым көнәркәшлек бар. Уны ышаныслы ҡулдарға, эшләргә теләгәндәргә һәм эшләй алғандарға, айырым һөҙөмтәләргә эйә булғандарға бирәбеҙ. Иртәгә Хөкүмәт кәңәшмәһендә иғтибар һәм тиҙләтеүҙе талап иткән айырым мәлдәргә туҡталасаҡбыҙ, - тине Андрей Назаров, эш сәфәренә һығымта яһап. Сығанаҡ, фото: Башҡортостан Хөкүмәтенең матбуғат хеҙмәте.