Миңлеғәле Шайморатовтың тыуған көнөндә Өфөлә "Геройҙар ваҡыты" тамамланды

27 августа, легендар 112-се Башҡорт кавалерия дивизияһы командиры, Рәсәй Геройы, генерал-майор Миңлеғәле Шайморатовтың тыуған көнөндә, Өфөнөң Совет майҙанында Башҡортостан Башлығы Радий Хәбиров IV Бөтә Рәсәй "Геройҙар ваҡыты" асыҡ патриотик йыр конкурсының финал сараларында ҡатнашты. Төбәк етәксеһе хөрмәтле ҡунаҡтар менән бергә Миңлеғәле Шайморатов һәйкәленә сәскәләр һалды. Хәтерегеҙгә төшөрәбеҙ, 2022 йылдың 11 октябрендә асылған скульптура композицияһы 112-се Башҡорт кавалерия дивизияһы яугирҙәренә һәм тыуған ил өсөн ғүмерен биргән ватандаштарыбыҙға арналған. Башҡортостан Башлығы шулай уҡ бөйөк Еңеүҙең 80 йыллығына арналған Бөтә Рәсәй "Геройҙар ваҡыты" конкурсында ҡатнашыусыларҙы сәләмләне. – Бөгөн Рәсәй Геройы, генерал-майор Миңлеғәле Шайморатовтың тыуыуына 126 йыл тула. Был көндө бында йыл һайын үткәрелеүсе "Геройҙар ваҡыты" конкурсының финалы үтә, – тине Радий Хәбиров. – Беҙ Бөйөк Ватан һуғышы, 112-се Башҡорт кавалерия дивизияһы геройҙарыбыҙҙың бөйөклөгө һәм хәтере алдында баш эйәбеҙ. Бөгөн беҙҙең эргәлә – яңы быуын геройҙары. Улар – махсус хәрби операцияла ҡатнашыусылар, уларҙың ғаилә ағзалары, туғандары һәм яҡындары. Беҙ һеҙҙең алдығыҙҙа баш эйәбеҙ, ғорурланабыҙ һәм һеҙҙе сикһеҙ хөрмәт итәбеҙ. Хеҙмәтегеҙ еңелерәк булһын һәм өйҙәрегеҙгә зыян күрмәй ҡайтһын өсөн барыһын да эшләйәсәкбеҙ. Төбәк етәксеһе "Еңеү алда" йыры өсөн Гран-при яулаған Лидия Трифонованы 300 мең һумлыҡ диплом һәм аҡсалата сертификат менән бүләкләне. Башҡортостан Башлығы шулай уҡ махсус хәрби операция ветераны Дмитрий Ивановҡа генерал Шайморатов миҙалын һәм ҡул менән идара ителгән автомобиль асҡыстарын тапшырҙы. Билдәләп үтергә кәрәк, "Геройҙар ваҡыты" конкурсында бөтә илдән композиторҙар һәм шағир-йырсылар ҡатнашты. Быйыл Рәсәйҙең 31 төбәгенән 230-ҙан ашыу ғариза килгән. Жюриҙы традиция буйынса Рәсәйҙең атҡаҙанған артисы Ольга Кормухина етәкләне. Сараны Бөтә Рәсәй "Геройҙар ваҡыты" патриотик йыр конкурсы финалсыларының гала-концерты тамамланы. Журналистар менән әңгәмәлә Башҡортостан Башлығы Армия мәҙәниәте көндәренең һәм "Геройҙар ваҡыты" фестиваленең әһәмиәтен юғары баһаланы. - Был - республикабыҙҙың иң сағыу мәҙәни һәм патриотик сараларының береһе. Беҙҙең өсөн – Башҡортостан халҡы өсөн - ул Совет майҙанында үтә, унда генерал- майор Миңлеғәле Шайморатов һәйкәле тора, - тине Радий Хәбиров. - Иғтибар итегеҙ, бында бик күп йәштәр килә. Һәм, әлбиттә, улар араһында махсус хәрби операцияла ҡатнашыусылар ҙа бар – беҙҙең яңы геройҙар. Фото сығанағы: glavarb.ru.