Иғтибар үҙәгендә – дини объекттар

Бөгөн Өфөлә Башҡортостан Башлығы Радий Хәбиров Воскресение кафедраль соборы төҙөлөшө менән танышты, шулай уҡ “Воскресение соборы” хәйриә фонды ултырышында ҡатнашты. Мәғлүм булыуынса, Комсомол урамындағы ҡорам 2003 йылда Рус православие сиркәүенең Өфө епархияһы башланғысы менән төҙөлә башлағайны. Проекттың авторы – архитектор Рудольф Кирайдт. Комплекстың дөйөм майҙаны 2,8 мең квадрат метрҙан ашыу тәшкил итә. 2007 йылда собор төҙөлөп бөтөп, эске һәм тышҡы биҙәү эштәре ҡалғайны, әммә финанслау туҡталып торҙо. Былтыр декабрҙә ҡорам төҙөлөшөн яңыртыу өсөн хәйриә фонды асыла. Уның ойоштороусыһы – “Роснефть” компанияһы вице-президенты Геннадий Букаев. Фондтың попечителлек советы рәйесе итеп Башҡортостан Башлығының хәләл ефете Каринэ Хәбирова һайлана. Хәйриә фондының генераль директоры Рөстәм Үлмәҫов август айына ҡарата ҡорамдың төп залында эшләү өсөн ағас ҡоролмалар күтәреү, бинала электр системаларын һәм янғын хаҡында иҫкәртеү ҡулайламаларын монтажлау, көмбәҙҙе ремонтлау, стеналарҙы йөҙләү хаҡында һөйләне. Уның әйтеүенсә, эш бер нисә йылға һуҙыласаҡ. – Иң мөһиме – беҙ ҙур күләмле ике дини объект – “Әр-Рәхим” мәсете һәм Воскресение соборы төҙөлөшөн тамамлау йәһәтенән эш башланыҡ, – тине республика етәксеһе. – Беләм, ойоштороу һәм юридик мәсьәләләр бик күп булыр. Уларҙы беҙ бергәләп хәл итербеҙ. Хәйриә фондының эше төплө уйлап һөҙөмтәле ҡоролған. Проекттарҙы тормошҡа ашырыуҙа Башҡортостан халҡы ла мөмкин ҡәҙәр ярҙам күрһәтә ала. Архитектор Андрей Табанаков соборҙың эске биҙәлешендә файҙаланыласаҡ проект ҡарарҙары тураһында һөйләне. Башлыса, республикала етештерелгән материалдарҙы киңерәк ҡулланмаҡсылар. “Воскресение соборы” хәйриә фонды ултырышында шулай уҡ киләһе йылға пландарҙы ла тикшерҙеләр. Фото: Башҡортостан Башлығы сайтынан.