«Տաշիր» ընկերությունների խմբի նախագահ Սամվել Կարապետյանը 3-րդ անգամ է հարցաքննվել, այս անգամ՝ ենթադրյալ փողերի լվացման գործով, Armenia Today-ին հայտնել է նրա փաստաբան Ռուբեն Հակոբյանը։
«Ընդհանուր բովանդակությունն այն է, որ ներկայացված մեղադրանքն ակնհայտ ապօրինի է, իրականության հետ ընդհանրապես աղերս չունի։ Չեղած բանի վերաբերյալ ի՞նչ ցուցմունք տալ»,- շեշտեց փաստաբանը։
Նա մանրամասնեց, որ հարցաքննությունը տեղի է ունեցել դեռևս կալանքի երկարաձգման միջնորդությունից առաջ՝ մինչև օգոստոսի 10-ը։ Հակոբյանը նշեց, որ ընթացակարգն է այդպիսին՝ նոր մեղադրանքի դեպքում հարցաքննություն է իրականացվում։
«Ըստ կարգի՝ նոր մեղադրանք առաջադրելու դեպքում հարցաքննության միջոցով հարցնում են դիրքորոշում՝ մեղադրանքի վերաբերյալ»,- հավելեց նա։
Փաստաբանը, հաշվի առնելով նախաքննությունը, չմանրամասնեց, թե, մասնավորապես, ինչ են հարցրել Կարապետյանից, և ինչ է նա պատասխանել։ Միևնույն ժամանակ նա վերահաստատեց պնդումը, որ Կարապետյանին առաջադրված մեղադրանքն ապօրինի է։
Հակոբյանը տեղեկացրեց, որ Կարապետյանին, ընդհանուր առմամբ, 3 անգամ են հարցաքննել։
«Մեկ անգամ հաձաքննել են քննչական մարմնում, երբ ձերբակալել են, երկու անգամ էլ՝ քրեակատարողական հիմնարկում»,- ասաց փաստաբանը։
Հակոբյանը նաև հայտնեց, որ վերջին օրերին Կարապետյանի նկատմամբ քրեական վարույթ իրականացնող մարմինների կողմից որևէ նոր միջնորդություններ պաշտպանական խմբին հայտնի չեն, իսկ պաշտպանության կողմն իրականացնում է բոլոր գործողությունները մշակված մարտավարությամբ և ռազմավարությամբ։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Վարչապետ Նիկոլ Փաշինյանը խիստ էր արձագանքել Կարապետյանի հայտարարությանը: Գործարարը չի ընդունումմեղադրանքը:
2025 թվականի հուլիսի 4-ին Երևանում անցկացվել էր երթ՝ հաջակցություն կալանավորվածԿարապետյանի։ Այնուհետև նա իր ուղերձում հայտարարել էր, որ պատրաստ է դուրս գալ պայքարի ճանապարհ՝ հանուն հայրենիքի և համախմբել ժողովրդին արմատապես նոր ուժի շուրջ։ Հուլիսի 14-ին նա հայտնել էր նոր քաղաքական թիմ ձևավորելու մեկնարկի մասին։
Օգոստոսի 15-ին դատարանը 2 ամսով երկարաձգել էր Կարապետյանի կալանքը։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
«Իրավական ամենաթողություն է»․ Սամվել Կարապետյանի փաստաբանները կբողոքարկեն կալանքը երկարաձգելու որոշումը
Նորություններին հետևեք մեր կայքում, ինչպես նաև Telegram-ում և YouTube-ում