Ново изисканіе преврачаіе стары познаніа о твореніи планет. Научницы одкрыху, же планеты-странницы, тѧжки свободни од звѣзднаго влиіаніа объіекты, можѫт творити собствени планетни составы.
Одкрытіе‐то быше створено на даных, же быху достани од далноглѧда Джеімс Уебб, дружиноі изискателіеі од Высшаго училища Сент-Андріус. Научницы изучаху млади самостоіни объіекты планетарноі тѧжины, 5-10 крат тѧжше Іупитера, и увидиху признацы, же они имаіѫт можності владаніа дисками творива, аналогично звѣздным, од кторых сѧ роджѫт планеты.
Произход планет-странников
Обыкновено планеты сѧ обрачаіѫт около звѣзд, але планеты‐странницы ‐ то сѫ объіекты, же свободно плывѫт в Простору. Ихніе слабо подчервено свѣтло твори их трудными дліа изъіавеніа и глѧданіа, але они можѫт дати цѣнну информаціу о пробѣгѣ твореніа планет внѣ традициіных звѣздных состав.
Сѧ личи, же нѣкторы од них іе сѧ творили подобно звѣздам при колапсу плынных облаков, оногда ини быху изкиднуты од своіих звѣздных состав.
Корыстаіѫчи мочни подчервени можности далноглѧда Уебб, изискатели од Сент-Андріуса заіедно с меджународноі дружиноі сѫ изучили осем свободно плывѫчих объіектов од конца лѣта 2024 доднесі. Чутливи устроіы далноглѧда направиху можності достаніа спектроглѧдных снимков высокоі іакости, же одкрыіѫт дивни подробности.
Твореніе планетных дисков
Осем познаных объіектов имаіѫт излишно подчервено свѣтло, же означаіе іествованіе околопланетных дисков ‐ плоскых пыловых колец, же имаіѫт кліучову роліу в първых кроках поіавеніа планет. По-корыстным іе сѫтності кремных зърен в овых дисках. Присѫтності кремна значи рост пыла и крусталов, что іе важным кроков твореніа камѧных планет. Хоті доднесі мы быхме видѣли кремнови изкиды у звѣзд и гнѣдых карликах, але само напърво мы имаху успѣх глѧданіа того у объіектов планетарноі тѧжины.
«То іе първо изъіавеніе кремных своіств в дисках около свободно плывѫчих объіектов іупитерноі тѧжины, ‐ каже главны творец изисканіа доктор Белинда Даміан од Высшаго училища Сент-Андріус, - то докаже, же будовни околности дліа твореніа планеты іествуіѫт аж около міров, же сѫ само мало повече неж Іупитер и самотно плывѫчих в Простору».
Новы поглѧд твореніа планет без звѣзд
«Изисканіа‐те кажѫт, же объіекты близки тѧжиноі до плынных гигантов, можѫт творити собствени малы планетни составы» - иззначаіе доктор Алекс Шоліц, руководар проіекта. Іеднак он каже, же трѣба додатковых изисканиі абы подтвърдити сѫтності овых состав.
Меджутым, нови даны сѫ согласными с предними працами, кторы предполагаху, же диски около свободно плывѫчих планет можѫт сѧ сохранити миліоны лѣт ‐ дості дліа твореніа планет.
Ако овы пробѣгы бѫдѫт подтвърдени, звѣздознавцы можѫт признати іествованіе малых планетных состав, на подобіе менішеноі Сълнечноі составы. Одкрытіе‐то додаваіе нови подробности в разуменіе развоіа планетных состав, іер предже іе сѧ мыслило неможным іествованіе планеты без звѣзды-господара.