🗣Загаһашан
Николай Дамдинов
Содном хүбүүн хахууляараа
Сохын шэнээн ялаагана
Эрьедэ гаргажа хаямсаараа,
Ээрэмшээжэ баярлаа гэнэ.
Олзын эрхим бууба гэжэ
Оог хашхарга табяа юм ха.
Һүрхэй тэрэ жараахайгаа
Һүүлһээнь һэжээд абаа юм ха.
Тэсэлгүй ааша юун һайн ха һэм:
Тэршээ тэрэ ялааганань
Горхон уруугаа һүрэн унажа,
Гоёор тамаран арилаа гэнэл!
Урагшагүй загаһашанаймнай
Ухаа алдаһан гээшэнь үзэлэй,
Хотигонуурхан жараахайнгаа
Хойноһоонь хараһаар үлэшөө бэлэй.
Алад саашаа ошохо бүреэ
Алдууршаһан ялааганань
Алда ута болоһон мэтээр
Ахайхандамнай һанагдаа гэнэл.
— Хадаран баригдаад, халишабал даа,
— Гэжэ нэгэндэ гэмэрбэ ха.
— Сурхай, — гэжэ нүгөөдэдэ
Сухалтайгаар гүбэрбэ ха.
Дам саашадаа тара жараахайнь
Даашагүй хүндэ боложорхёол даа:
— Тулажа тулажа алдаашамни
Тула... байгаа һэн...— гэжэрхёол даа!
1964
«Буряад ФМ» гэһэн радиосубагай ба «Соел» сайтын
«МИНДАҺААР ДАМЖАҺАН ДУУНУУД – МЕЛОДИИ СТАРЫХ ПЛАСТИНОК» гэһэн түсэл.
#soyol