Беҙҙең танышыуыбыҙ бик ҡыҙыҡ ҡына килеп сыҡты. Ямғыр яуа, ә беҙ теҙелеп баҫып концерт номерҙары ҡарап торабыҙ. Эргәмдә МХОнан ҡайтҡан Иҫке Бәпес ауылының шәп ир-егете Ғәйфуллин Нәсих Наил улы ҡул сатырын бер нисә кешегә еткерергә маташа. Шул ваҡыт һул яғымда торған егет мине ямғырҙан ҡаплай. Рәхмәт әйттем дә русса:"Вы откуда приехали?" - тигән булам. "С Баймака" - тигән яуапты ишеткәс:"Яҡташым икәнһең дә баһа! Һаумы, ҡустым!" - тип ҡосаҡлап күрештем. "Мин Шүлкәнән!" - тигәнемә ҡаршы:"Байтуринамы әллә? "-тигән һорауҙы ишетеп, аптырап ҡалдым. Күптән яттан белгән кешем, икеләтә ҡоҙам Рәсих Йортбәков булып сыҡты. Ағайым бик күп тапҡыр уның турала маҡтап, һоҡланып һөйләгәне бар ине. Беренсе Этҡол урта мәктәбенең физкультура уҡытыусы булып эшләүсе был егет үҙ уҡыусыларында аттарға, ат спортына ҡарата һөйөү тәрбиәләй. Уның дәрестәренә уҡыусылар ат менән киләләр, атта һыбай йөрөргә, уҡтан атырға һәм төрлө күнегеүҙәргә өйрәнәләр. Ҡыҙҙар һәм малайҙарға был бик оҡшайҙыр тип уйлайым, сөнки, әгәр мин уҡыусы булһам, рәхәтләнеп йөрөр инем бындай дәрестәргә! Башҡорт рухы, милли традицияларҙы һаҡлаған һәм үҫтергән был егет менән яҡындан танышыуым - үҙе үк ҙур бәхет! Ә күстәнәскә алып килгән ҡымыҙы эсеп туйғыһыҙ! Юнир Ҡоланбаевтың бер туған ҡайнағаһы булып сығыуы - тағы ла бер көтөлмәгән шатлыҡлы яңылыҡ булды. Ҡымыҙ эсеп, Юнирҙе һәм Бурятия ҡунағы Нима Батуевты йырлатып, шиғыр уҡып, шашлык ашап, мунса инеп, рухлы әңгәмә менән төндөң яртыһы нисек үткәнен дә һиҙмәй ҡалғанбыҙ.
Ярыштың икенсе көнөндә Рәсих Йортбәковтың абсолют еңеүсе булыуын ишеткәс, минән бәхетлерәк кеше булмағандыр. Бигерәк тә уның был еңеүе беренсе тапҡыр түгел икәнен белгәс, ныҡ ғорурландым. Афарин, Рәсих ҡустым - ҡоҙам! Киләсәктә лә ошо изге эшеңдә уңыштар юлдаш булһын, яңы үрҙәр, яңы еңеүҙәр теләйем һиңә! Һине тик үҙең әҙерләгән уҡыусыларың ғына еңһендәр - уҡытыусы өсөн был иң юғары күрһәткес. Алға, тик алға! Беҙ Баймаҡтар бит әле!!!