“Сетевик” килен тынғы бирмәй

“Хәҙер социаль селтәрҙәрҙә кем генә, ниндәй генә тауар тәҡдим итмәй!? Селтәр бизнесы тормошобоҙҙоң айырылғыһыҙ өлөшөнә әйләнде инде. Берәүҙәр үлеп барған кешене аяҡҡа баҫтырырлыҡ көскә эйә бәлзәмдәр-майҙар тәҡдим итә, икенселәр экологик йәһәттән 100 процент таҙа сифатлы продукцияһын маҡтай, өсөнсөләр тәҡдим иткән порошоктан гөлдәр ҙә күкрәп үҫә, унитаз-раковиналар ҙа ялтырап ҡала... Мин быларға һис тә ҡаршы түгелмен: һорау-ихтыяж бар икән, әйҙә һатһындар. Ысынлап та, шау тәбиғи составтан торған бәлзәм һәм майҙарҙың төрлө сирҙәргә килешеүен дә кире ҡаҡмайым. Килешә икән, рәхәтләнеп ҡулланығыҙ. Мин социаль селтәр аша ла, телефон аша ла туҡтауһыҙ ошо селтәрҙәргә ҡушылырға, аҡса эшләргә саҡырған сауҙагәрҙәргә ҡаршымын. Аптырағас, “Бәйләнештә”ге битләүемә “Селтәрле бизнес тәҡдим итмәҫкә!” тип яҙып ҡуйҙым. Шөкөр, тәҡдимдәр кәмеп ҡалды. Әммә һуңғы бер йылда киленем тынғы бирмәй: “Апай, минең аҫҡа тор, бизнесымды үҫтерергә ярҙам ит!” ти. Шулай үтенә торғас, Стәрлелә һәм Өфөлә йәшәгән ике апайҙы үҙ яғына ауҙарып алды. Хәҙер улар ҙа көнө-төнө шул продукцияны рекламалай. Ғаилә табындары, ҡунаҡтар башынан аҙағынаса тиерлек шул шәп эсемлек һәм препараттарҙың мөғжизәле көсө тураһында һөйләшеүгә арнала. Мин аҡса эшләргә, матур, етеш йәшәргә ынтылған кешеләргә гел ҡыуанам. Шуға күрә киленемдең, апайҙарымдың селтәрле бизнес менән мауығыуына һис ҡаршылығым юҡ. Үҙем дә эшҡыуар, бәләкәйерәк булһа ла, икмәк һәм кулинария цехым бар. Был эш шул тиклем күп ваҡытымды һәм көсөмдө ала, шуға күрә бәлзәм-май рекламаларға, уларҙы һатырға, киленем ыңғайына төрлө шау-шыулы осрашыуҙарға, тренингтарға йөрөргә һис тә генә ваҡытым да, әмәлем дә юҡ. “Һин йәшәгән ҡалала ла беҙҙең ғаиләнең селтәре китер ине, ул бит бөтәбеҙ өсөн дә файҙалы, табышлы буласаҡ”, - ти килен. Ә яңыраҡ бөтөнләй шаҡ ҡатырҙы. “Ярай, ышанмаһаң тор! Көнө-төнө цехыңда шапылдап йөрөп ауырыһаң, ҡуллана башлағаныңды белмәй ҙә ҡалырһың әле!” – тимәһенме. Шул тиклем асыуландым, ныҡ ҡына һүҙгә килештек. Ә һеҙ нимә эшләр инегеҙ бындай осраҡта? Туғандар менән ара боҙоуҙың яҡшы түгеллеген аңлайым, әммә улар ҙа минең фекеремде, ҡарашымды иҫәпкә алырға тейеш, тип уйлайым”. Мәҙинә исемле ҡатын һөйләгән тарих. Нәсих Хәлисов фотоэтюды.