Радий Хәбиров махсус хәрби операция ветерандарына ярҙам үҙәгендә булды

”Үҙ йортом”да Башҡортостан Башлығы Стәрлетамаҡтан махсус хәрби операцияла һәләк булған ҡатнашыусыларҙың ғаиләләре, ҡала хәрби ветерандары ассоциацияһы һәм Ватан яугирҙәре ғаиләләре комитетының урындағы бүлексәһе ағзалары менән осрашты. Төбәк етәксеһе һәләк булған яугирҙәрҙең ғаиләләренә ихлас ҡайғы уртаҡлашыу һүҙҙәрен еткерҙе. - Башҡортостан улдарығыҙ тураһында һәр саҡ хәтерләйәсәк, һеҙҙең менән бергә буласаҡ. Үҙегеҙҙең проблемаларығыҙҙы йәшермәгеҙ, мөрәжәғәт итегеҙ. Иң мөһиме - үҙ-үҙеңә бикләнмәү. Муниципалитет хакимиәте һәр ваҡыт һеҙҙең менән бәйләнештә булырға тейеш. Хәтерегеҙгә төшөрәм, һәләк булғандарҙың балалары мәктәпте тамамлағандан һуң конкурсһыҙ юғары уҡыу йорттарына уҡырға инә ала. Быйыл МХО яугирҙәренең 300-ҙән ашыу балаһы ошондай хоҡуҡ менән файҙаланған, - тип һыҙыҡ өҫтөнә алды Радий Хәбиров. Радий Хәбиров күрһәткән батырлыҡтары һәм ҡаһарманлыҡтары өсөн һәләк булған Владимир Николаевтың ҡатыны һәм Юрий Евстафьевтың һеңлеһенә Генерал Шайморатов орденын тапшырҙы. Шулай уҡ республика етәксеһе генерал Шайморатов миҙалы менән Стәрлетамаҡ ветерандары ассоциацияһы рәйесе, «Башҡортостан геройҙары» программаһы финалисы Олег Коневты һәм яугирҙәр Азат Ҡыҙрасов менән Дмитрий Бахтинды бүләкләне. 2022 йылдың декабрендә Стәрлетамаҡта ойошторолған Ватан яугирҙәре ғаиләләре комитетын Янина Волочаева етәкләй. Уның ире Валентин Волочаев (позывнойы “Волк”) Александр Доставалов исемендәге батальон составында үҙ теләге менән фронтҡа китә. Ҡыҙғанысҡа ҡаршы, яугир һәләк була. Үлгәндән һуң Ҡаһарманлыҡ ордены менән бүләкләнә. - Беҙҙең ойошманың төп бурысы - хәрби хәрәкәттәр ветерандарына һәм һәләк булған геройҙарҙың ғаиләләренә һәр яҡлап ярҙам күрһәтеү. Бынан тыш, үҙ илебеҙҙең тарихына, мәҙәниәтенә һәм традицияларына ихтирам тәрбиәләү, ветерандар араһында даими осрашыуҙар, тәжрибә уртаҡлашыу һәм әхлаҡи ярҙам күрһәтеү аша бәйләнештәрҙе нығытыу маҡсатында йәштәрҙе патриотик тәрбиәләү менән шөғөлләнәбеҙ, – тип һөйләне Янина Волочаева. Эштең тағы бер йүнәлеше – МХО ветерандарына психологик ярҙам күрһәтеү һәм уларҙы тыныс тормошҡа яраҡлаштырыу. Бының өсөн ватан яугирҙәре ғаиләләре комитеты ағзалары тейешле уҡытыу үткән. Республика Башлығы билдәләүенсә, был эшмәкәрлек бик мөһим. - Махсус хәрби операция тамамланғандан һуң ярҙам кәрәк буласаҡ. Уларға тыныс тормошҡа яраҡлашырға ярҙам итәсәкбеҙ, – тине Радий Хәбиров.