Урман янғындарын иҫкәртеү һәм һүндереү үҙәге хеҙмәткәрҙәре Башҡортостанда 240 саҡрымдан ашыу урман юлы булдырған һәм ошоғаса булғандарын реконструкциялаған. Был «Экология именлеге» милли проектының (национальноый проект «Экологическое благополучие») маҡсаттарына өлгәшеүгә булышлыҡ итә, тип хәбәр иттеләр республиканың Урман хужалығы министрлығынан. Бындай юлдар урмансыларға янғын урынына тиҙ арала барып етергә мөмкинлек бирә, шулай уҡ янғынға ҡаршы эштәр алып барыу өсөн хеҙмәт итә, сөнки улар, массивтарҙы айырым участкаларға бүлеп, уттың таралыуына ҡамасаулай. Бынан тыш, улар ярҙамында белгестәр ҙур территорияларҙы даими күҙәтеү аҫтында тота, янғын сығанаҡтарын асыҡлай һәм янғын хәүефһеҙлеге ҡағиҙәләрен үтәүҙе контролдә тота. Шулай уҡ санитар ҡырҡыу һәм ауған ағастарҙы йыйыу өсөн дә юлдар кәрәк. – Урман юлдарын төҙөү – ҡатмарлы һәм күп көс талап иткән эш. Ул урындағы үҙенсәлектәрҙе һәм янғын хәүефһеҙлеге талаптарын иҫәпкә алып трассаны проектлауҙы, һыҙатты ағастарҙан һәм ҡыуаҡтарҙан таҙартыуҙы һәм башҡа күп нәмәләрҙе үҙ эсенә ала, – тип хәбәр итте республиканың Урман янғындарын иҫкәртеү һәм һүндереү үҙәге етәксеһе Айрат йосопов. «Экология именлеге» милли проекты тирә-яҡ мөхит тураһында хәстәрлек күрә һәм уны кешеләр өсөн уңайлы итә. Эш бер юлы бер нисә йүнәлеш буйынса бара: ҡалдыҡтарҙы сорттарға айырыу һәм эшкәртеү өсөн инфраструктура булдырыу, сүплектәрҙе бөтөрөү һәм һыу ятҡылыҡтарын таҙартыу, урмандарҙы һаҡлау, атмосфераға ташландыҡтарҙы кәметеү, экологик туризмды үҫтереү һәм биологик төрлөлөктө һаҡлау. Яңыртылған милли проекттар РФ Президенты Владимир Путиндың ҡарары буйынса 2025 йылдан тормошҡа ашырыла. Фото: https://fotobank02.ru