Ո՞ւմ իրավունքներն է պաշտպանում ՀՀ ՄԻՊ-ը ՝ հիվանդ, անօգնական կալանավորների՞, թե՞ նրանց իրավունքներն ու օրենքը ոտնահարող քրեական վարույթ իրականացնողների
Մտացածին, վրիժառությունից ծնված անհեթեթ մահափորձի մեջ մեղադրվող Ստեփան Սամվելյանին պատկան մարմինների, հատկապես ՀՀ ՄԻՊ-ի հանցավոր ամենաթողության պայմաններում փաստացի մահափորձի են ենթարկում․ հաշմանդամ, սրտային, երիկամային, անոթային անբավարարությամբ և շաքարախտով տառապող ՀՀ քաղաքացուն մեր հետևողական հանրային բողոքների հիման վրա սրտի ստենտավորման վիրահատություն կատարելուց հետո, հակառակ բժշկական բոլոր ցուցումների, արագորեն տեղափոխել էին «Արմավիր» քրեակատարողական հիմնարկ, իսկ երբ նրա առողջական վիճակը կեսգիշերին կտրուկ վատթարացել է, ստիպված տարել են դատապարտյալների հիվանդանոց, թեև բոլոր ողջամիտ բժշկական ցուցումներով և արձանագրություններով նա պետք է տեղափոխվեր մասնագիտական հիվանդանոց։
Ավելին, ինչպես հայտնում է փաստաբան Զարուհի Փոստանջյանը, ՔԿՀ-ում Սամվելյանից բռնագրավել են ՍԲ Գրիգոր Լուսավորիչ հիվանդանոցի կողմից նրան տրված հիվանդության պատմագիրը՝ կատարված բուժհետազոտությունների և առողջական վիճակի մասին բոլոր արձանագրումներով, որը չեն փոխանցել անգամ դատապարտյալների հիվանդանոցի բժիշկներին։ Զարուհի Փոստանջյանն իրազեկվելով ապօրինությանը՝ անմիջապես ահազանգել է ՄԻՊ գրասենյակ, որտեղից նրան հայտնել են, թե աշխատանքային ժամանակն ավարտված է և օրենքով սահմանված ժամկետում՝ 5 օրում կպատասխանեն։
ՄԻՊ ղեկավար Անահիտ Մանասյանին ենք դիմում ՝ այդպե՞ս եք պաշտպանում մարդու իրավունքները, թե՞ այդպես հիվանդ, անօգնական թոշակառուի դեմ մահափորձ կատարողների իրավունքներն եք պաշտպանում։ Հիվանդության պատմագիրը թաքցրել են, որպեսզի կոծկեն իրենց ապօրինի վարքագիծը։
Պահանջում ե՛նք հարգել բոլոր կալանավորների տարրական իրավունքները, ամենից առաջ՝ ապրելու իրավունքը․ դա ձեր ոչ միայն մարդկային, բարոյական, այլև սահմանադրական ու ծառայողական պարտականությունն է։
