Һайлаған һөнәренә тоғролоҡ һаҡлай

Арабыҙҙа ғүмерен спортҡа арнаған замандаштарыбыҙ бихисап. “Башҡортостан” гәзитенең “Бәйләнештә” төркөмөндә барған конкурста ихлас ҡатнашҡан, сығышы менән Әбйәлил районының Амангилде ауылынан булған, ошо тыуған ауылына тоғролоҡ һаҡлаған Нил Мәһәҙей улы Ҡужәхмәтов – тап шундайҙарҙан. Ул оҙаҡ йылдар Амангилде урта мәктәбендә физкультура уҡытыусыһы булып эшләгән осорҙа уҡыусыларының, тәрбиәләнеүселәренең генә түгел, уларҙың ата-әсәһенең, ауылдаштарының, яҡташтарының да хөрмәтен яулаған. Геройыбыҙҙың ата-әсәһе Хәтирә менән Мәһәҙей Ҡужәхмәтовтар биш балаһында ла спортҡа, сәләмәт тормош алып барыуға һөйөү тәрбиәләп үҫтергән. - Ғаиләбеҙҙә спорт ябай хобби ғына түгел, ә ысын йола һәм ул быуындан-быуынға күсеп килә. Әсәйемдең һәм атайымдың миҫалында беҙ ғаиләлә әүҙем булып, урамда йүгереп, ярыштарҙа ҡатнашып үҫтек, – ти Нил Мәһәҙей улы. - Ауылдағы клуб артындағы майҙансыҡта йыш ҡына волейбол уйнай торған инек. Ғөмүмән, беҙҙең быуын вәкилдәре спорт менән дуҫ булып буй еткерҙе. Амангилде урта мәктәбен тамамлағандан һуң Нил Ҡужәхмәтов Магнитогорскиҙағы педагогия училищеһына физкультура уҡытыусыһына уҡырға инә. Унда белем алған ваҡытта саңғы буйынса ул беренсе разрядҡа эйә була. Егет училищены тамамлап өлгөрмәй, әрме хеҙмәтенә бара. Унда ла Нил Ҡужәхмәтов яратҡан шөғөлөнән – спорттан – айырылмай. Еңел атлетика буйынса йыйылма команда составында була, хәрби-спорт комплексының өсалыш буйынса беренсе разрядын ала. Тыуған яҡтарына ҡайтҡас, Нил Мәһәҙей улы училищелағы башланған уҡыуын тамамларға һәм ҡулына диплом алырға, тигән маҡсатты ҡуя. Артабан ул Пласт ҡалаһындағы балалар һәм спорт мәктәбендә тренер булып эшләй. Бер аҙ ваҡыт үткәс, уға тыуған яғына эшкә ҡайтырға тәҡдим итәләр, һәм ул һис икеләнмәй ҡайта. Өфө нефть эшкәртеү заводына етештереү практикаһы буйынса инструктор-методист булып эшләү тәҡдименән дә баш тартмай егет. Ә ундағы шәп спорт базаһы күнекмәләрҙе артабан да дауам итеүгә бына тигән сәбәпкә әйләнә. Өҫтәүенә яҙмышын – Зифа Ғизетдин ҡыҙын да ошонда тап итә. Ул үҙе лә сығышы менән Әбйәлилдән, Әлмөхәмәт ауылынан. Ошо уҡ заводта шәфҡәт туташы булып эшләй. Йәштәр, ғаилә ҡорғас, тыуған яҡтарына ҡайтырға ҡарар итә. Зифа менән Нил Ҡужәхмәтовтар район үҙәге Асҡарҙа эшкә төшә. Ғаилә башлығы – урындағы ремонт-техник предприятиела таҙартыу ҡоролмалары начальнигы, ә Зифа Ғизетдин ҡыҙы район дауаханаһына шәфҡәт туташы булып хеҙмәт биографияһын дауам итә. Әммә тыуған ауылға булған һөйөү көслөрәк була, һәм ғаилә Амангилдегә ҡайтып төпләнә. Нил Мәһәҙей улы Асҡар балалар һәм үҫмерҙәр спорт мәктәбе тренеры һәм Амангилде урта мәктәбендә физкультура уҡытыусыһы булып эшләй. Саңғы ярыштары буйынса балалар менән йылына ете-һигеҙ ярышта ҡатнаша һәм тренерҙың тәрбиәләнеүселәре 11 йыл рәттән алдынғылыҡты бер кемгә лә бирмәй! Еңел атлетика буйынса ла уңыштар тос була, әммә волейбол тренер эшендә төп урынды биләй. Ул әҙерләгән командалар район һәм зона ярыштарында уңышҡа өлгәшә. Һуңғараҡ волейбол блуйынса республика чемпионы булған команда 70 процентҡа амангилделәрҙән – Нил Ҡужәхмәтовтың тәрбиәләнеүселәренән – торған була. Бөгөн дә Амангилде ауылының волейбол командаһы көслөләрҙең береһе һанала. Тап улар билдәле дәүләт һәм йәмәғәт эшмәкәре Фәйзрахман Хисмәтуллиндың яҡты иҫтәлегенә турнир үткәрә башлай. Һөҙөмтәлә был спорт сараһы күпме йыл инде волейбол һөйөүселәрҙе бер урынға туплай. Нил Мәһәҙей улының тормош юлы – яратҡан һөнәреңә тоғролоҡ билдәһе ул. Уның ҡатыны Зифа Ғизетдин ҡыҙы ла ярыштарҙан ситтә ҡалмай. Уларҙың балалары Айнур менән Айгөл дә бәләкәйҙән спорт менән дуҫ. Ҡужәхмәтовтарҙың ейәнсәр-ейәндәре лә спорт менән мауыға. Айҙар самбо менән дуҫ, Айтуған шахмат менән мауыға. Ә Йәмилә “Тамыр” студияһында шөғөлләнә. Ҡужәхмәтовтарҙың йортондағы бер бүлмәлә эленеп торған, ағастан эшләнгән футболкаға Нил Мәһәҙей улы ҡасандыр лайыҡ булған 100-ҙән ашыу миҙал эленгән. Уның күп йыллыҡ фиҙакәр хеҙмәте Башҡортостандың Мәғариф һәм фән, Спорт министрлыҡтарының Рәхмәт хаттары менән билдәләнгән. Ул – Башҡортостандың мәғариф отличнигы, “Йыл тренеры” титулына лайыҡ булған. Оҙаҡ йылдар тормошон спортҡа, сәләмәт тормош алып барыуға арнаған Нил Мәһәҙей улы өсөн https://vk.com/app7198399_-104965500#poll688ba910e9620563fff0d604 һылтанмаһы буйынса инеп тауыш бирергә мөмкин. Уға һәм конкурста ҡатнашҡан башҡа физкультура уҡытыусылырына, тренерҙарға етеп килгән һөнәри барамдары айҡанлы изге теләктәрегеҙҙе юлларға онотмағыҙ. Беҙ ҙә Нил Мәһәҙей улын етеп килгән Физкультурниктар көнө менән ҡотлайбыҙ һәм ныҡлы сәләмәтлек, ғаилә именлеге, шатлыҡ-ҡыуаныстар, уңыштар теләйбеҙ. Фотолар: Нил Мәһәҙей улы Ҡужәхмәтовтың шәхси архивынан.