«Алтын къол» - яхшы ёл

«Алтын къол» - яхшы ёл!

25-26-нчы июльда Къабарты-Балкъар республиканы къарачайланы ва балкъарланы Черек районундагъы «Голубые озёра» деген ерде «Алтын къол» деген халкъ саниятыны 9-нчу халкъара фестивалы оьтгерилди.

Шу чарагъа Темиркъазыкъ Кавказны республикаларындан ва Ставропольский крайдан гелгенлер бар эди.

Шу фестивальны «Къайсынгъа юз абат» деген тарихи эсделиклени ва маданятны якълав фонду район муниципалитет булан бирге оьтгере.

Чара оьтгерилеген майданы бою булан усталар этген тастарлар, милли опуракълар, териден этилген тюрлю-тюрлю согъуп этилинген чораплар, опуракълар, алтындан этилген тагъымчакълар, ертурман, хынжал, тюбек ва сурат этегенлени саниятын гёрме бола эди. Бир бойда милли ашланы да гёрме бола. Оьзлени къол ишлерин фестивальгъа 100-ден де артыкъ адам алып гелген эди.

Шо фестивальны ичинде милли аралыкълагъа ва халкъланы адатларына багъышлангъан халкъара конференцияда оьтгерилген.

Шонда докладлар булан филология илмуланы доктору, 200 илму ишни автору Т.Биттирова, Ставрополь крайдагъы М.Лермонтовну атындагъы музей-заповедникни ёлбашчысыны орнунбасары Е.Кривецкая,

Россияда «Къазах тили» деген халкъара центрны президенти С. Тайкешева, 46 китапны автору, Россияны язывчуларыны союзуну ортакъчысчы Б.Гьажаматов, шаир, таржумачы ва журналист, КБР-ни маданиятыны ат къазангъан къуллукъчусу С.Мусукаева, Дизайнерлени Союзуну халкъара ассоциациясыны ортакъчысы З.Эзиева сёйледилер.

«Алтын къол» деген халкъны саниятын аян этеген фестиваль оьтгерилегени 9-нчу гезик. Йыл сайын фестивальда ортакъчылыкъ этегенлени санаву арта. Муна, бу гезик де, районну тюрлю-тюрлю юртлардагъы юз йыллар булан юрютюп тургъан саниятланы янгыртгъан, тирилтген кёп адам гелген. «Алтын къол» деген халкъны саниятын аян этеген фестиваль эки де халкъны ортакъ байрамы болуп токътай. Фестивальны борчу - шулай фестиваллардан таба уллуларыбыз юрютген саниятланы унутулма къоймай сакъламакъ, усталагъа кёмеклешмек, оланы бажарывлугъун аянлашдырмакъ, оьсюп гелеген яшъёрюмлени шогъар сюювюн болдурмакъ. Къарачай ва балкъар миллетлер асрулар булан къыйынлы къысматын енге тутуп гелген, оланы тили де бир, санияты да бир. Олар саниятын наслудан-наслугъа бере туруп гелген ва гьали шо саниятгъа яшъёрюмлени къошулагъаны да сююндюре.

«Алтын къол» деп маъналы ат тагъылгъан фестиваль республиканы аривлюкге тенги ёкъ «Голубые озера» деген айбатлы еринде оьтгерилегени де кёплени юрегинде къалажакъ.