Малайҙар үҙ ҡулдары менән эшләгән батмандарҙы ғорурлыҡ менән алып ҡайттты

Бынан бер нисә ай элек Башҡортостан Республикаһының “Ирҙәр ҡоро” йәмәғәт ойошмаһы үҙенең “Бәйләнештә”ге сәхифәһендә Белорет районының Ноҡат ауылы эргәһендәге йүкәнән батман эшләү сараһы үткәреү өсөн атайҙар менән уландарҙы саҡырыу тураһында иғлан баҫтырғайны. Комиссия был сарала ҡатнашырға теләгәндәр араһынан, эш ҡоралдары һанын иҫәпкә алып, 15 атайҙы һәм уларҙың улдарын һайлап алды. Ни өсөн йүкәнән батман эшләүҙе һайлағандар? Былтыр атайҙар улдары менән солоҡ яһаған. Балта һәм бензин бысҡыһы менән эшләү ауырға төшкән. Иртәнән кискә тиклем эшләргә тура килә – барыһы ла ныҡ арыған. Быйыл эште ябайлаштырырға — йүкәнән батман эшләргә ҡарар иткәндәр. Сара башланыр алдынан РФ Дәүләт Думаһы депутаты, республиканың “Ирҙәр ҡоро” йәмәғәт ойошмаһы етәксеһе ойошманың Белорет районы буйынса бүлексәһенең әүҙем ағзаларына, күп балалы атайҙарға, махсус хәрби операцияла ҡатнашыусыларға наградалар тапшырҙы. Бәйге тәртибе менән таныштырғандан һуң атайҙар улдары менән кәтмән әҙерләүгә тотондо. Арҡыры балта (бәлйә), аталғы, өңгөс, юнғыс, сапҡы, ҡыйғаҡ кеүек халыҡ хеҙмәт ҡоралдарын файҙаланып, батман эшләү көнө буйы дауам итте. Ҡайһы берҙәре, ағасты боҙоп, яңынан эште башларға мәжбүр булды. Батмандар кискә табан ғына әҙер булды. Уның ҡабығын әрсемәнеләр, сөнки ағас ҡороғансы көтөргә кәрәк. Малайҙар үҙ ҡулдары менән эшләгән батмандарҙы ғорурлыҡ менән алып ҡайттты. Был ағас һауыт-һабаны өйҙә файҙаланасаҡтар. Унда гөлйемеш, мәтрүшкә, йүкә сәскәһе һәм башҡа файҙалы үләндәр яҡшы һаҡлана. Әсәйҙәр иһә был һауыттарға ҡарап, уларҙың һәр ваҡыт улының һәм иренең ҡулдары менән эшләнгәнен иҫкә төшөрәсәк, ә балалар 10 – 20 йылдан һуң үҙ балаларына һәм ейәндәренә кәтмәндәрҙе күрһәтәсәк, был эштең тарихы тураһында һөйләйәсәк. – Бына шулай көнө буйы атайҙар улдары менән гаджетһыҙ, бер-береһенә ярҙам итеп, боронғо кәсепте үҙләштерҙе. Хеҙмәт ҡоралдарын ҡулланыу, ағас менән эшләү күнекмәләре ир-атҡа кәрәк. “Егет кешеге етмеш төрлө һөнәр ҙә аҙ” тип әйтелә халыҡ мәҡәлендә. Шулай уҡ усаҡта әҙерләнгән башҡорт аш-һыуы ла онотолмаҫ тәьҫораттар ҡалдырҙы. Ойоштороусыларға – Башҡортостан Республикаһының “Ирҙәр ҡоро” ойошмаһының Белорет районы буйынса бүлексәһенә, шәхсән Азамат Заһитуллинға һәм уның ҡатынына, Инйәр ауыл советы хакимиәтенә, Ноҡат ауылы халҡына рәхмәт, – тип белдерҙе Зариф Байғусҡаров. 60-тан ашыу кеше ҡатнашлығындағы был сара ойоштороусыларҙың – Ирҙәр ҡороноң ағзаларының шәхси аҡсаһына уҙғарылды. Кис арыған, әммә ҡәнәғәт һәм бәхетле булған атайҙар улдары менән республика райондарына һәм ҡалаларына өйҙәренә таралды. Фото: БР "Ирҙәр ҡоро" ойошмаһынан.