Эшләп ҡал, студент!

Бөгөн республика Хөкүмәтендә Башҡортостан Башлығы Радий Хәбиров уҙғарған аҙналыҡ оператив кәңәшмәлә Рәсәй студенттар отрядтарының төбәк бүлексәһе эшмәкәрлеге тикшерелде. Йәштәр ойошмаһының эше тураһында уның етәксеһе Элина Саматова хәбәр итте. Ул 2025 йылдың башында республика Башлығы указы буйынса Башҡортостанда студенттар отрядтарын үҫтереү буйынса ведомство-ара координация советын булдырыуҙарын иҫкә төшөрҙө. Уның маҡсаты – төбәктең студент отрядтарының эшен яңы кимәлгә сығарыу. 2025 йылда республикала йәштәрҙең хеҙмәт семестрында ҡатнашыу мөмкинлеге киңәйтелде, тине ул. Әгәр 2024 йылда Башҡортостанда бер генә хеҙмәт проекты ла тормошҡа ашырылмаһа, 2025 йылда ауыл хужалығында, производствола, сервиста, педагогикала һәм медицинала биш йүнәлеш буйынса 45 проект старт алды. Уларҙа 2 464 кеше ҡатнаша. 2025 йылдың авгусына тағы ла ете яңы проектты тормошҡа ашырыу планлаштырыла, улар 1,1 мең ҡатнашыусыны үҙ эсенә аласаҡ. 52 проект сиктәрендә 3,5 меңдән ашыу студент эшкә урынлашасаҡ. Йәштәрҙең бер өлөшө республиканан ситтә проекттарҙа ҡатнаша. Мәҫәлән, йәйге хеҙмәт семестры сиктәрендә башҡа төбәктәрҙә Башҡортостандан 549 студент эшләй, тағы 250 кешене йыл аҙағына тиклем эшкә урынлаштырырға планлаштыралар. Сервис йүнәлеше буйынса йыл әйләнәһенә эшкә урынлашыу ваҡытында республика предприятиеларында 1 340 кеше эшләй. Студенттарҙан тыш, хеҙмәт отрядтары составында уҡыусылар ҙа бар – әле улар 800, йыл аҙағына тиклем студенттар отрядтарында үҫмерҙәр һанын 2 меңгә еткерергә планлаштыралар. Элина Саматова билдәләүенсә, республикала бөтәһе 5,6 мең студент отряды ҡатнашыусыһы эшкә урынлаштырылған, йәйге хеҙмәт семестры аҙағына тиклем был күрһәткесте 7,6 мең кешегә тиклем арттырырға планлаштыралар. Сағыштырыу өсөн, былтыр улар 3 930 ине. Егет һәм ҡыҙҙарҙың эш хаҡы 25 -112 мең һум тәшкил итә. Башҡортостан Башлығы ҡушыуы буйынса республиканың белем биреү ойошмалары базаһында студенттар отрядтарының яңы ячейкаларын булдырыу буйынса эш алып барыла. Әгәр 2024 йыл аҙағында төбәктең юғары уҡыу йорттарында һәм колледждарында 113 отряд эшләһә, хәҙер уларҙың һаны 122-гә тиклем арта, 6 000 самаһы кеше эшләй. Студент отрядтарының эшен ойоштороуға предприятиеларҙы, шулай уҡ муниципалитеттарҙы әүҙемерәк йәлеп итергә кәрәк, тип һыҙыҡ өҫтөнә алды Башҡортостан Башлығы. – Бер йыл самаһы элек беҙ студент отрядтарына ҙур иғтибар бирә башланыҡ, һөҙөмтәләр күренә башланы, – тип билдәләне Радий Хәбиров. – Йәштәр өсөн был аҡса эшләү мөмкинлеге генә түгел, тәү сиратта аралашыу һәм ыңғай эмоциялар. Фото: Башҡортостан Башлығы сайты.