Хеҙмәттәре алға китә

Бөгөн аҙналыҡ оператив кәңәшмәлә “Хеҙмәт етештереүсәнлеге” федераль проектын тормошҡа ашырыуҙы тикшерҙеләр. Инициатива 2025 йылдан “Һөҙөмтәле һәм конкурентлы иҡтисад” милли проекты составына инә. Башҡортостан Хөкүмәтенең беренсе вице-премьеры – иҡтисади үҫеш һәм инвестиция сәйәсәте министры Рөстәм Моратов республиканың илдең Иҡтисади үҫеш министрлығы рейтингында хеҙмәт етештереүсәнлеге йәһәтенән алдынғы төбәктәр төркөмөнә инеүен һәм үҙен Рәсәй Федерацияһының көслө субъекты булараҡ танытыуын хәбәр итте. Был бөтә төп параметрҙар буйынса, шул иҫәптән проекттарҙы мәғлүмәти оҙатыу буйынса топ-5 төбәктәрҙә тотороҡло позиция менән дә раҫлана. – Инициативаға 53 меңдән ашыу кеше эшләгән 206 предприятие йәлеп ителде. Уларҙың барыһы ла комплекслы ярҙам ала, шул иҫәптән һаҡсыл етештереү ҡоралдарын бушлай индереү, хеҙмәткәрҙәрҙе уҡытыу һәм Төбәк компетенциялар үҙәге ҡатнашлығында бизнес-процестарҙы оптималләштереү, – тине Рөстәм Моратов. 2019 йылдан алып Төбәк компетенциялар үҙәге 100-ҙән ашыу проектты тормошҡа ашыра, улар республика предприятиеларына пилот ағымында ғына 4,5 миллиард һумлыҡ дөйөм иҡтисади һөҙөмтә алырға мөмкинлек бирә. Процестарҙы оптималләштереү иҫәбенә компаниялар сығымдарҙы кәметә һәм етештереү күләмен арттыра. Мәҫәлән, Туймазының “Корона” фабрикаһы матрастар сығарыуҙы ике тапҡырға тиерлек арттырған, ә Өфөнөң “Орбита” предприятиеһы аяҡ-ҡулдарҙың хәрәкәтсәнлеген тергеҙеү өсөн реабилитация ҡорамалдары-аппараттар сығарыуҙы ике тапҡырға арттырған. Беренсе вице-премьер шулай уҡ, милли проект сиктәрендә компаниялар өҫтәмә ярҙам саралары – льготалы займдар, экспортҡа сығыу өсөн акселерация программалары һәм “Етештереүсәнлек лидерҙары” программаһы буйынса идарасыларҙы уҡытыу ала, тип һөйләне. Проекттың тармаҡ сиктәрен киңәйтәләр уға туристик тармаҡ предприятиеларын һәм шифахана-курорт комплексын тоташтыралар. Проект етештереүсәнлекте арттырыуға булышлыҡ итә һәм предприятиеларҙа яңы корпоратив мәҙәниәт формалашыуына йоғонто яһай, тине Радий Хәбиров. – Бер үк ваҡытта кеше күберәк эште уңайлы шарттарҙа башҡара, – тине Радий Хәбиров. – Мин үҙем миҫалдар күрҙем: инәһең, һәм кешеләр үҙҙәре был ысынлап та бик шәп, тиҙәр. Беҙ бер быуатлыҡ Өфө моторҙар эшләү производство берекмәһендә, Мәләүез минераль ашламалар заводында булдыҡ. Унда предприятиеларҙың тышҡы ҡиәфәте нисек үҙгәреүен күрәбеҙ – газондар ҡырҡылған, фасадтар тәртипкә килтерелгән. Был – хеҙмәт һәм унда эшләгән кешеләргә хөрмәт күрһәтеү мәсьәләһе. Сөнки етештереүсәнлекте күтәреү нормаль шарттар булмаған урындарҙа була алмай. Фото: Башҡортостан Башлығы сайты.