Халыҡ-ара "На рахате" һаулыҡ һәм туризм форумында сәләмәтлеккә арналған өлөш булды. Унда ғалимдар, врачтар ҡатын ҡыҙҙар өсөн бик кәрәкле темаларға сығыш яһанылар.
"Йоматау шифахананы" диетологы Регина Прыткова артыҡ ауырлыҡты диета тотмай ғына ташлау методикаһын презентацияланы. "БАД-тарһыҙ, системалы рәүештә эшләп, үҙ хәлеңә ҡайтып була,"- ти Регина Фәнил ҡыҙы.
"Ҡарағай" шифаханаһынан Таисия Бәҙретдинова шифалы ҡарағай һауаһының кеше һаулығына тәьҫире хаҡында һөйләне.
Неля Шәрипова "Выбор Ланг" аппаратының тын юлдары ауырыуҙарын дауалауы хаҡында лекциялар уҡыны. Астманан ҡаҡшаған кешеләргә был аппарат беренсе сеанстан һуң уҡ ярҙам итә икән. Ул аппарат республикала икәү генә. Береһе Өфөлә "Шератон Плаза"ла урынлашҡан.
Октябрьский ҡалаһында урынлашҡан “Реабилитациялау һәм сәләмәтлекте тергеҙеү үҙәге”нең генераль директоры Елена Халфина уларҙың үҙәгенең төп дауалау сере - файҙалы сероводород тураһында һөйләп ишеттерҙе. Баҡтиһәң, Сочиҙағы сероводород беҙҙең Отябрьскийҙа ла бар икән. Һәм уларҙың үҙәгендә бик күп ауырыуҙарҙы дауалайҙар икән. Арҡа һөйәген һуҙалар, түлһеҙлекте дауалайҙар һәм башҡа кеше өсөн бик шәп дауалар алырға була.
Киләһе спикерыбыҙ – медицина фәндәре кандидаты, хирург, сосудтар хирургияһы буйынса шәп белгес Николай Алексеевич Талов һаулығыбыҙға иғтибарлы булырға, тәмәке тартмаҫҡа өндәне.
“Яҡтыкүл” шифаханаһы врач-акушер-гинекологы Дилә Ирғәлина әйтеүенсә, уларға килеп эләккән ҡатын-ҡыҙҙар тап гинекология буйынса күп тикшеренеүҙәр үтә, тулы дауалау курсынан һуң сәләмәтләнеп ҡайтып китәләр, һәр дүртенсе ҡатын-ҡыҙ түлһеҙлектән ҡотола, икенсе юлы килгәндәрендә бәпестәре менән киләләр, шифаханаға ҙур рәхмәттәр әйтәләр.
Ультра тауыш диагностикаһы врачы, акушер-гинеколог Кристина Золотареваның сығышы ла бик фәһемле булды. Ул ҡыҙ балаларҙы 3, 6, 13, 15, 17 йәштәрҙә мотлаҡ гинекологка йөрөтөргә кәрәклеген һыҙыҡ өҫтөнә алды. Ҡатын-ҡыҙҙар иһә йыл һайын биш төөрлө тикшеренеү үтергә тейеш. Шулар араһында маммография, УЗИ һәм башҡалар.
Резеда Нурисламова, сәстәр буйынса белгес, сәс ҡойолоу, ағарыу, себорея буйынса яҡшы лекция уҡыны. Сәстәрҙе дөрөҫ шампунь менән йыуырға кәрәк тине. Баҡтиһәң, беҙҙең Өфөлә сәстәр проблемаһы буйынса бик шәп клиника эшләй икән – Доктор Ибатуллинаның сәс клиникаһы.
Шулай итеп, был ултырыш ҡатын-ҡыҙ һаулығы өсөн бик файҙалы һәм кәрәк булды. Нисек кенә тимә, һәр кеше үҙ сәләмәтлегенә иғтибарлы булырға, ваҡытында тикшеренеүҙәр үтеп торорға бурыслы.
Роза Хөснуллина.
"Башҡортостан ҡыҙы" журналы.