Өфө кампусы вәкиле - Волга буйы федераль округында иң яҡшы студент лидеры

Өфөнөң вуз-ара кампусы резиденты булған нефть техник университеты студенты Иван Корнилов Һамарҙа үткән Бөтә Рәсәй “Студент лидеры” конкурсының округ этабында беренсе урын алған. Конкурста Волга буйы федераль округынан барлыҡ студент профсоюздары ойошмалары етәкселәре ҡатнашҡан. – Студенттар лидерлығы төбәгебеҙҙең киләсәген төҙөү өсөн мөһим роль уйнай. Маҡсатлы һәм инициативалы йәштәр прогресҡа этәргес булып тора, республикала кампус шарттарында яңы идеялар һәм проекттар тәҡдим итеп, уларҙы тормошҡа ашыра. Был еңеү Башҡортостандың Бөтә Рәсәй аренаһында тотҡан урынын нығытыу өсөн ҙур өлөш тә ул, - тине Башҡортостан Хөкүмәте Премьер-министры урынбаҫары – сәнәғәт, энергетика һәм инновациялар министры Александр Шельдяев. Иван Корнилов “Нефть-газ ҡорамалдарын файҙаланғанда һанлы һәм сервис технологиялары” белгеслегендә уҡый, беренсе курстан университеттың йәмәғәт тормошонда һәм социаль әһәмиәтле сараларҙы ойоштороуҙа әүҙем ҡатнаша. Студент уҡыу менән бер үк ваҡытта бер нисә вазифаны башҡара: студенттар профкомы рәйесе урынбаҫары, студенттар профбюроһы рәйесе һәм ӨДНТУ-ның Нефть һәм газ инжинирингы һәм һанлы технологиялар институты директоры урынбаҫары. Татарстандан икенсе урынды яулаған Юлия Валенцева менән бергә Иван Корнилов сентябрь аҙағында Санкт-Петербургта үтәсәк проекттың финалында Волга буйы федераль округы исеменән сығыш яһаясаҡ. – “Студент лидеры” - Рәсәйҙең төп профсоюз конкурсы. Беренсе курстан уҡ унда ҡатнашырға хыялланһам да, финалға тиклем барып етермен тип уйламағайным. Әҙерлек эштәрендә командам ярҙам итте. Уларһыҙ еңеү булмаҫ ине, сөнки лидер һәр ваҡыт командала тыуа, ә ҙур ойошманың ҡаҙаныштары уның һәр ағзаһының уңыштарынан тора. Студент саҡ - хыялдарыңды тормошҡа ашырыу өсөн иң яҡшы ваҡыт, - ти Иван Корнилов. 2024 йылда ӨДНТУ-ның Нефть һәм газ инжинирингы һәм һанлы технологиялар институты профбюроһы командаһы илдең иң яҡшы студенттар берләшмәләре араһында “Һин – лидер” конкурсында икенсе урын яулағайны. Белешмә. Евразия Фәнни-белем биреү үҙәгенең юғары уҡыу йорттары араһындағы студенттар кампусы Рәсәй Президенты ҡушыуы буйынса һәм Рәсәй Мәғариф һәм фән министрлығының «Фән һәм университеттар» милли проектын тормошҡа ашырыу сиктәрендә төҙөлә. Өфө кампусы проекты - 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялары, эшлекле зоналары, магазиндары, уңайлы скверҙары һәм башҡа уңайлы ҡала мөхите объекттары булған студенттар өсөн урын. Мәғлүмәт һәм фото сығанағы: https://pravitelstvorb.ru/news/27193/