Йәш депутаттарҙың тәүге форумы үтәсәк

Бөгөн “Башинформ” мәғлүмәт агентлығында Башҡортостандың йәш депутаттар советының матбуғат конференцияһы уҙғарылды. Осрашыуҙа ошо советтың директоры Артур Зәйнуллин, совет вәкиле Кирилл Елизаров ҡатнашты. Башҡортостанда барлыҡ йәш депутаттарҙы туплаусы ойошма булдырылыуы тураһында күптәрегеҙ ишеткәндер. Был ойошманың ағзалары – республиканың урындағы үҙидара вәкәләтле органдарына, шулай уҡ Дәүләт Йыйылышы –Ҡоролтайға һайланған 35 йәшкә тиклемге парламентарийҙар. Артур Зәйнуллин уны булдырыу тарихына туҡталды. Депутаттар корпусының әүҙем өлөшө йәштәр менән танышыу маҡсатында быйыл Башҡортостандың Йәштәр сәйәсәте министрлығы менән берлектә төбәктәрҙә күсмә осрашыуҙар уҙғарыла. Быйыл февраль айынан майға тиклем төбәк округтарының биш үҙәгендә булалар. Унда 500-ҙән ашыу урындағы үҙидара органдарының вәкилдәре менән осрашалар. Шул уҡ ваҡытта улар өсөн белем биреү лекциялары ойошторола. Ошо осрашыуҙар һөҙөмтәһендә йәш депутаттарға үҙ-ара аралашыу, урындағы проблемаларҙы хәл итеүҙә тәжрибә менән уртаҡлашыу өсөн дөйөм майҙансыҡ кәрәклеге асыҡлана. - Республикабыҙҙа барлыҡ йәш депутаттарҙы берләштергән ойошма булдырыу идеяһы барлыҡҡа килде. Быйыл 18 апрелдә ул теркәлде. Ҙур маҡсаттарҙың береһе – йәш депутаттар һанын арттырыу. Бөгөн Башҡортостанда 8840 муниципаль депутат иҫәпләнә. Улар араһында йәштәр 636 кеше, был бары 7 процентты тәшкил итә. Әгәр динамикаға күҙ һалһаҡ, 2018 йылда 1300 йәш депутат булған, 2020 йылда – 870. Беҙҙең маҡсат йәш депутаттар һанын күбәйтеү, - тип һөйләне Артур Альберт улы. Йәш депутаттар советы вәкиле Кирилл Елизаров та күсмә төбәк сараларынан алған кисерештәре менән бүлеште. –Бик ҡыҙыҡлы, инициативалы йәштәр. Улар республикабыҙҙа йәшәргә, эшләргә тигән ҙур теләк менән яналар. Депутатлыҡ эше - ул йәмәғәт-сәйәси эш. Йәш депутаттар советы – власть һәм кешеләр араһындағы тере күпер, – тине ул. Бөгөнгө көндә йәш депутаттар советының урындағы бүлексәләренең кураторҙары ла тәғәйенләнгән. Улар райондағы барлыҡ йәш депутаттарҙы координациялаясаҡ. Республикабыҙҙа “Башҡорт ихаталары”, “Урындағы башланғыстарға булышлыҡ итеү”, “Реаль эштәр” кеүек бик күп программалар ҙа эшләп килә. Йәш депутаттар советы был программаларҙы уңышлы итеп тормошҡа ашырыуға ла үҙ өлөшөн индерәсәк. Муниципаль депутаттарҙың халыҡ менән тығыҙ бәйләнештә эшләүе быға ыңғай йоғонто яһаясаҡ. Йәш депутаттар советы төрлө саралар уҙғарыуҙы планлаштыра. Уларҙың барыһы ла кешеләрҙе берләштереүгә йүнәлтелгән. “Ышаныс нөктәһе” программаһы ла - киләсәккә маҡсатланған эштәрҙең береһе. Уның маҡсаты - ышаныс бағлап килгән, депутат итеп һайлаған халыҡҡа ярҙам итеү. Матбуғат конференцияһында тиҙҙән йәш депутаттар советының тәүге форумы үткәреләсәге тураһында ла хәбәр ителде. Был сарала советтың бурыстары тураһында тағы ла ишетербеҙ. Автор фотоһы.