Како выдаіѫт нови моделираніа, околі Млечнаго Пѫти могѫт іествовати вече спѫтниковых галактик, неж іе были одкрыты звѣздознавцами. Одкрытіе овых галакти бѫде подтвърдило обчи модел ΛCDM, кторы описуіе родженіе и развоі Всіеміра.
Изъисканіе дружины Даремскаго высшаго училища поіединише математични моделы и моделираніе супер-изчислителіеі. Резултаты показаху, же околі нашеі Галактикы мусѧт іествовати вече на 80-100 спѫтников, неж іе одкрытым.
«Знаме, же Млечны Пѫті имаіе близ 60 одкрытых спѫтниковых галактик. Але с поводу нашых изчислениі ово число муси быти много выше – десѧткы слабых галактик, же сѫ на близкоі далности» - разповѣдише главны творец изъисканіа доктор Изабелі Сантос-Сантос, - «Ако наши предказаніа сѫ вѣрни, то бѫде добрым аргументом «за» ΛCDM-теоріи».
Резултаты працы быху выдани 11 липніа 2025 года на всіакогодному сбору звѣздознавскаго сплоченства в Даремѣ (Британіа).
ΛCDM – заклад модела
Изъисканіе има заклад на моделу ΛCDM, ктор каже же обыкновена матеріа приноси само 5% до цѣлаго состава Всіеміра. Остатни 95% приносѧт тіемна матеріа (около 25%) и тіемну енергіи (70%). Овы модел каже, же галактикы както Млечны Пѫті сѫ дості рѣдкыми и работѧт срединами множества малых галактик. Іеднак главноіѫ проблемоі долго времѧ бѣше недостаточно число спѫтников односно того числа, же предповѣди модел. Хоті модел тоі іе имал успѣх в множествѣ провѣр, заіаснити ову несоодносності быше трудным.
Срединна видеіа іе в тому, же галактикы сѧ роджѫт в срединах тѧжкых гало тіемноі матеріи. Судба тых гало, како говорѧт научницы, може быти причиноі, зачто многи спѫтникови галактикы до нынѣ не сѫ одкрыты.
Искаіѫчи скрыты галактикы
Изъискатели корыстаху нѣколіко сочасных (современных) компутерных моделы, наприклад Aquarius (наі‐детално гало тіемноі матеріи Млечнаго Пѫти) и GALFORM (ктора уважи главни физичны пробѣгы родженіа и развоіа галактик). Първи моделираніа не имаху успѣха изъіавити наі‐блѣди галактикы с поводу техничных проблем, але днесі хвала новым устроіам то іе возможным.
Моделираніе показаше, же нѣктори гало сѧ обрачаіѫт околі Млечнаго Пѫти с първых стѫпеніеі развоіа Всіеміра, постѫпно сѧ лишаіа тіемноі матеріи и звѣзд. Како резултат – ови галактикы сѫ веліми малыми, блѣдыми и худо видимыми. Такови галактикы сѫ достали имѧ ‐ «галактикы-сироты».
Одкрытіе такых галактик може рѣшити недостатка спѫтников. Предни моделираніа домнѣваху, же сіи галактикы быху были разрушени, але ново изъисканіе каже, же многи іествуіѫт и днесі, хоті и веліми блѣдыми. Резултаты не даіѫт знаніе, гдѣ они сѫ, коліко их имаіе, але поіасніаіе, зачто они не сѫ одкрытыми донынѣ.
Исканіе доказов близ Млечнаго Пѫти
Далноглѧдами, кторы сѫ добыли велікы развоі в послѣдно времѧ, звѣздознавцы сѧ надѣіѫт увидити сіи блѣди и невидими галактикы. Іедным од такых надѣіных далноглѧдов іе LSST глѧдални имени Вѣры Рубин, ктора іе достала първи снимкы в овому году.
«Звѣздознавцы корыстаіѫт наши предповѣданіа како маіак дліа соравненіа новых даных», - казаше Сантос-Сантос. «Іе можным, же іуж в близкоі бѫдѫчности мы хте можеме увидити сіи «изникнуты» галактикы, что бѫде важным одкрытіем и хте повѣди нам вече, зачто Всіемір іе таков, каков іе».
Предбѣжно, дружина говори о близ 30 блѣдых объіектах, кторы могѫт быти чѧстіу сих скрытых спѫтников, але трѣба додатковых изъисканиі абы познати точно, сѫ ли тіи «галактиками-сиротами» или само кулными скопеніами (громадами).
«Ако популаціа наі‐блѣдых спѫтников, же мы предповѣдихме, бѫде наідена, то бѫде успѣхом ΛCDM-теоріи», - казаше професор Карлос Френк, учѧстник изъисканіа. «То такоже показа мочності физикы и математикы: корыстаіѫчи природни законы, супер-изчислители и моделираніе, мы можеме дати точни предповѣданіа, кторы зѣздознавцы могѫт провѣрити далноглѧдами. Ничто може быти по‐лѣпым».