Ամենայն հայոց Կաթողիկոսին հեռացնելու և նրան փոխարինող գտնելու պատասխանատվությունը դրվել է վարչապետի աշխատակազմի և նրա ղեկավար Արայիկ Հարությունյանի վրա, գրել է «Ժողովուրդ»-ը՝ հղում անելով իր աղբյուրներին։ Ըստ թերթի՝ ՀՀ վարչապետ Նիկոլ Փաշինյանն այդքան էլ գոհ չէ Հարությունյանի աշխատանքից, քանի որ Վեհափառի հեռացման ուղղությամբ դեռևս հստակ քայլեր չեն արվել, բացի այդ հոգևորականներն ավելի են թշնամացել իշխանությունների հետ:
Եկեղեցականների շրջանում զայրույթ է առաջացրել Հարությունյանի հուլիսի 4-ի ֆեյսբուքյան գրառումը, որտեղ նա հայտարարել էր, որ «եպիսկոպոսների ստորագրությամբ հայտարարությունը խայտառակություն է և արձանագրում, որ Կտրիճ Ներսիսյանը հովանավորում է մեր երկրում ահաբեկչությունը և ապապետականությունը»: Թերթի պնդմամբ՝ իշխանականները ևս ճիշտ չեն համարել Հարությունյանի այդ գրառումը, որն ըստ նրանց, փոխանակ ներքին կարգով հարթի եկեղեցի-իշխանություն փոխհարաբերությունները, ավելի է վատացնում իրավիճակը:
Թերթը հավելել է, որ եթե Հարությունյանը ձախողի նոր Կաթողիկոսի ընտրությանը, Վեհարանից Գարեգին Բ-ին հեռացնելու պլանները, ապա չի բացառվում, որ Փաշինյանը նրան կհեռացնի այդ պաշտոնից: Մայիսի 29-ից սկսած Փաշինյանը սոցիալական ցանցերում հայհոյանքներով լի մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով՝ կասկածի տակ դնելով նրա՝ կուսակրոնության ուխտի պահպանումը։
Փաշինյանը հուլիսի 8-ին հայտարարել էր, որ Մայր Աթոռ Սուրբ Էջմիածինը «զավթված է հակաքրիստոս, շնաբարո, ապազգային, ապապետական խմբակի կողմից»՝ հավելելով, որ պատրաստվում է Վեհարանի «ազատագրումն առաջնորդել անձամբ»։ Իրավապահ մարմինները հունիսի 25-ի և 27-ի խուզարկություններից հետո երկու ամսով կալանավորել էին Բագրատ արքեպիսկոպոս Գալստանյանին, Շիրակի թեմի առաջնորդ Միքայել արքեպիսկոպոս Աջապահյանին, ինչպես նաև շարժման 14 աջակցի։
Գալստանյանը և «Սրբազան պայքարի» աջակիցները մեղադրվում են պետական հեղաշրջման և ահաբեկչության նախապատրաստության փորձ կազմակերպելու մեջ։ Նրանցից ոչ ոք չի ընդունում մեղադրանքը: Կարդացեք նաև՝ Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր «Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
Նորություններին հետևեք մեր կայքում, ինչպես նաև Telegram-ում և YouTube-ում