Умартасы айыуҙың урыны - кампуста

Петербург халыҡ-ара иҡтисади форумында Башҡортостан стендына ҡуйылған умартасы айыу һыны Өфөлә “Йәштәр һәм балалар” милли проекты ярҙамында төҙөлгән Вуз-ара студенттар кампусына урынлаштырылды. Футуристик бал бронендәге 6,5 метрлыҡ арт-объект студенттарҙы һәм кампус ҡунаҡтарын беренсе ҡатта ҡаршы ала. Айыу үҙенсәлекле “Берлога” проектының өлөшө булып тора һәм республиканың фәнни ҡеүәте символына әйләнде лә инде, тип хәбәр ителде Башҡортостан Хөкүмәтенең матбуғат хеҙмәтенән. – Бөгөн төбәгебеҙ – Рәсәйҙең төп ғилми-белем биреү үҙәктәренең береһе. Беҙ тәүгеләрҙән булып заманса кампустар селтәре булдыра башланыҡ. Ул хәҙер халыҡ-ара кимәлгә сыҡты. Кампус – студенттар өсөн лабораториялары булған уникаль мөхит: яңы ҡорамалдарҙа етештереү шарттарында эшләргә, үҙенсәлекле тәжрибәләр үткәрергә мөмкин. Уҡытыу практика һәм аныҡ мәсьәләләрҙе хәл итеү менән айырылғыһыҙ. Ә айыу – үткән менән киләсәк берлеге билдәһе – боронғо традицияларҙы заманса ҡаҙаныштар менән бәйләй. Уның урыны ошонда, – тине республика Хөкүмәте Премьер-министры Андрей Назаров. Авторҙарҙың фекеренсә, умартасы айыу кампус өсөн биҙәк кенә түгел, ә Башҡортостанда фәндең ышаныслы һаҡ аҫтында булыуы, нигеҙенең ҡеүәтлелеге, үҫеш мөмкинлектәренең киңлеге билдәһе. Ул шулай уҡ кампустың аҡыл сығанағы, яңы асыштар урыны икәнен күрһәтә. “Берлога” милли киберфизика платформаһы – уҡыусыларҙы файҙалы мобиль һәм видеоуйындар аша технология өлкәһенә күпләп йәлеп итеү маҡсатындағы Рәсәй проекты. Балалар программа төҙөргә, робот техникаһына, электроникаға һәм башҡаларға уйын аша өйрәнә, уларға илгә кәрәкле техник белгеслеккә йүнәлеш бирелә. Проект Рәсәй Федерацияһы Хөкүмәте ярҙамында Стратегик башланғыстар агентлығы, Милли технология башланғыстары платформаһы командаһы тарафынан 2023 йылдан алып тормошҡа ашырыла. Башҡортостан был йәһәттән пилот төбәк булды. Республикала ике йылға яҡын ваҡытта 100-ҙән ашыу яңы технология түңәрәге асылды, 600-ҙән күберәк сара уҙғарылды, уларҙа ете мең самаһы йәш кеше ҡатнашты. “Берлога” платформаһының түңәрәктәре заманса белем биреү программалары менән тәьмин ителгән, уларҙы уҙғарған остаздар квалификация күтәреү курстары үткән. Үҙебеҙҙә сығарылған ҡорамал комплекттары менән йыһазландырылған 20 терәк майҙансыҡ эшләй. Өфөләге Вуз-ара кампуста Киберфизика инновациялары оҫтаханаһы асылды, ул “Берлога” платформаһының Бөтә Рәсәй методика координацияһы үҙәгенә әйләнде. Унда йәш белгестәр, инженерҙар берләшмәләре ағзалары йыйылып, төбәктең иҡтисади үҫеше, илдең технология йәһәтенән үҙаллылығы йүнәлештәренә бәйле проекттар – пилотһыҙ системалар, киберфизика, видеоуйындар эшләү менән шөғөлләнә. Дөйөм алғанда, “Берлога” платформаһында дүрт флагман уйыны сыҡты һәм йәш белгестәрҙең 20 мини-уйыны акселерация үтә. Уларҙың һәммәһен технология йәһәтенән алдынғы инженер айыуҙарҙың донъяһы тураһындағы дөйөм сюжет берләштерә. Был проектты үҫтереү өсөн уға илдең барлыҡ төбәктәрен йәлеп итеү планлаштырыла. Милли платформа быйыл майҙа беренсе тапҡыр сит илдә күрһәтелде: Ҡытайҙа ойошторолған “Рәсәйҙә эшләнгән” күргәҙмәһендә “Берлога: умартаны һаҡлау” флагман уйынының инглиз һәм ҡытай телдәрендә программа төҙөүгә өйрәтеү элементтары булған халыҡ-ара версияһы презентацияланды. Фото: республика Хөкүмәте сайты.